Um 20 manns slösuðust í verslunarmiðstöð í miðborg Tókýó í Japan í dag eftir að maður úðaði efni þar innandyra að sögn lögreglu og slökkviliðs í borginni.
Yusuke Koide, talsmaður lögreglunnar í Tókýó, sagði í samtali við AFP að maður hefði úðað efni við hraðbanka á jarðhæð byggingarinnar, en embættismaður hjá slökkviliðinu á staðnum sagði að „um 20 manns hefðu slasast“ eftir tilkynningu um „lykt“.
Götunni fyrir framan verslunarmiðstöðina, sem er staðsett í hinu vinsæla og fína verslunarhverfi Ginza, var lokað í kjölfar atviksins og slökkviliðsbílar röðuðu sér upp meðfram götunni.
Hins vegar héldu viðskiptavinir áfram að koma og fara úr byggingunni um hliðarinnganga.
Fréttamaður AFP á staðnum sá tvo einstaklinga á sjúkrabörum vera flutta í sjúkrabíl á meðan slökkviliðsmenn og embættismenn í hlífðarbúningum fluttu fólk úr verslunarmiðstöðinni í sérútbúna bíla til skoðunar.
„Hingað til hafa 19 manns verið fluttir á sjúkrahús,“ sagði Ryosuke Kobayashi, embættismaður slökkviliðsins, við fréttamenn.
Ríkisútvarpið NHK sagði að meiðslin virtust vera minniháttar.
Mikið uppnám
Þar kom fram að talið væri að úðinn hefði innihaldið ertandi efnið kapsaisín, virka efnið í chilipipar, samkvæmt ónefndum heimildum úr rannsókninni.
Sjötug kona sem var í verslunarmiðstöðinni sagði við útvarpsstöðina að hana hefði byrjað að „svíða og verkja“ í hálsinn þegar hún nálgaðist hraðbankann.
„Þegar ég kom á staðinn var uppnámið þegar hafið og ég hélt að það hefði kannski kviknað smá eldur eða eitthvað.
„Þegar ég fór inn í hraðbankahornið fann ég fyrir kláða í hálsinum, hann var næstum dofinn,“ sagði hún.
Lögreglan rannsakar orsökina, sagði slökkviliðsmaður á vettvangi.
