Rússneskur stjórnarandstæðingur var í síðustu vikur settur á lista yfir erlenda erindreka og dæmdur til greiðslu sektar. Hann hugðist bjóða sig fram í þingkosningum í september en fær það ekki.
Frambjóðandinn heitir Boris Nadezdin. Eftirnafn hans er dregið af orðinu „nadezda“ sem þýðir von og því þótti það táknrænt að hann ætlaði að reyna að bjóða sig fram og vekja von um betri tíð. Svo verður þó ekki því Nadezdin hlaut dóm á föstudag. Það þýðir að hann megi ekki bjóða sig fram.
Dóminn hlaut hann fyrir að hafa árið 2023 birt mynd af öðrum stjórnarandstæðingi, Alexei Navalny, á samfélagsmiðlum. Nadezdin þarf að borga sekt sem jafngildir um 1.700 íslenskum krónum. Stuðningsmenn hans fjölmenntu í dómsal á föstudag. „Ég er nokkuð hress af því að helstu niðurstöður dómsins voru að ég er enn á lífi og frjáls,“ sagði hann í ávarpi fyrir utan dóminn. „Ég hef alltaf sagt að það sé gott að vera í Rússlandi, núna hefur mér verið gert að vera hér að eilífu,“ sagði stjórnarandstæðingurinn sem úrskurðaður hefur verið í farbann.
Flestir rússneskir stjórnarandstæðingar hafa flúið land eða eru í fangelsi, sumir eru ekki lengur á lífi. Nadezdin er einn fárra stjórnmálamanna í Rússlandi sem tala opinskátt gegn stríðsrekstrinum í Úkraínu og stjórnarháttum Pútíns. Hann ætlaði að bjóða sig fram til forseta 2024 og fólk stóð í röðum til að leggja undirskrift sína við framboðið, sem var að lokum úrskurðað ógilt af stjórnvöldum.
Kosið verður til þings og héraðsstjórna 20. september. Kosningarnar eru á viðkvæmum tíma fyrir stjórnvöld. Stríðsreksturinn tekur sífellt meiri toll af efnahagnum og langdrægar drónaárásir Úkraínumanna á olíuinnviði hafa leitt til eldsneytiskreppu.
