Ásdís kynnti drög að breyttu verklagi í bæjarráði á fimmtudag. Þau voru lögð fram til umræðu og miðast við að breytingarnar komi til framkvæmda á næsta ári.
„Við erum að kalla eftir því að starfsfólk mæti til læknis og fái staðfest veikindin,“ segir Ásdís.
„Þetta er svona að okkar mati 5 til 8% af þeim sem eru veikir á hverjum tíma.“
Margar stuttar fjarvistir gefa fleiri stig
Kópavogsbær skráir hversu oft starfsmaður er frá vegna veikinda og hve lengi í senn. Fjarvistirnar gefa stig á svokölluðum Bradford-kvarða. Sex veikindadagar gefa til dæmis fleiri stig ef starfsmaður veikist þrisvar í tvo daga en ef hann er veikur í sex daga samfleytt.
Bærinn notar stigin þegar til að fylgja eftir tíðum fjarvistum. Starfsmaður á þriðja þrepi kvarðans fer nú í samtal við hjúkrunarfræðing. Í drögunum er lagt til að skoða hvort starfsfólk á þriðja og fjórða þrepi, þeim tveimur efstu, þurfi að skila vottorði sem staðfestir að læknir hafi metið það. Starfsfólk á neðri þrepunum þyrfti almennt ekki að skila vottorði. Þá vill bærinn kanna hvort starfsfólk geti fengið að sjá eigin stig.
Trúnaðarlæknir gæti metið hvort forföll séu réttmæt.
Ef vottorð staðfestir ekki læknisskoðun yrði beðið um nýtt þar sem dagsetning skoðunar kemur fram. Berist það ekki yrði óskað eftir mati trúnaðarlæknis á því hvort starfsmaður sé vinnufær og hvort forföllin séu réttmæt. Bærinn myndi byggja ákvörðun um greiðslu veikindalauna á því mati og taka mið af lögum og kjarasamningum.
Samkvæmt gildandi kjarasamningi Starfsmannafélags Kópavogs getur yfirmaður þegar krafist vottorðs vegna endurtekinna fjarvista. Samningurinn kveður á um að bærinn endurgreiði starfsfólki kostnað við vottorð sem hann krefst og læknisviðtal til að afla þess.
Í drögunum eru einnig breytingar fyrir fólk í langtímaveikindum. Frá 1. janúar 2027 myndi ótímabundið læknisvottorð aðeins duga eitt og sér til að staðfesta áframhaldandi óvinnufærni ef trúnaðarlæknir hefði gefið það út eða staðfest það. Starfsfólk gæti lagt fram nýtt vottorð eftir þörfum. Þá er lagt til að leitað verði til trúnaðarlæknis ef starfsmaður á uppsagnarfresti er fjarverandi vegna veikinda.
Segir veikindi kosta bæinn um tvo milljarða á ári
„Við erum að sjá það að skammtímaveikindi hafa verið að lækka hjá Kópavogsbæ en það breytir þó ekki því að enn erum við að sjá að veikindakostnaðurinn er hár,“ segir Ásdís um stöðuna eftir tveggja ára átak bæjarins.
„Árlegur veikindakostnaður hjá Kópavogsbæ er í kringum 2 milljarðar,“ segir hún og bendir á að þegar margir veikist á sömu starfsstöð aukist álag á þá sem mæta til vinnu.
Í minnisblaði mannauðsstjóra kemur fram að kostnaðartölur bæjarins í mælaborði mannauðs byggist á grunnlaunum. Bærinn vinnur að því að ná utan um heildarkostnaðinn, þar á meðal yfirvinnu og önnur laun sem falla til í veikindafjarvistum.
Skráðum dögum vegna skammtímaveikinda fækkaði um 8,6 prósent fyrstu átta mánuði ársins miðað við sama tímabil í fyrra. Veikindalotum fækkaði um 2,5 prósent og þær styttust að meðaltali. Á sama tíma námu skammtímaveikindi meira en níu prósentum af þeim tíma sem starfsfólk átti að vinna í tólf starfahópum. Mannauðsstjóri bendir á að munur milli hópa geti meðal annars tengst eðli starfa, álagi og vaktavinnu.
Vill sjá hverju átakið hefur skilað
Eydís Inga Valsdóttir, bæjarfulltrúi Samfylkingarinnar, segir í bókun að heildarveikindahlutfallið sé hærra en þegar átakið hófst. Hún vill að bærinn leggi fram mat á kostnaði og árangri og setji töluleg markmið áður en reglunum verði breytt. Hún varar við því að „gengið sé enn harðar fram gagnvart veiku starfsfólki bæjarins“.
Meirihlutinn bendir á að átakið hafi fyrst og fremst beinst að skammtímaveikindum. Hann telur að fækkun veikindadaga á því sviði gefi tilefni til að halda áfram og segir drögin jafnframt gera ráð fyrir auknum stuðningi og forvörnum.
„Við erum auðvitað líka að grípa til þessara aðgerða til að ná betur utan um ástæður þess að fólk er kannski óvenju oft veikt,“ segir Ásdís. Með því geti bærinn betur metið hvort starfsfólk þurfi stuðning.
