Zohran Mamdani, borgarstjóri í New York, segir að borgaryfirvöld hafi ekki heimild til þess að framfylgja handtökuskipun Alþjóðlega sakamáladómstólsins í Haag, ICC, á hendur Benjamín Netanjahú, forsætisráðherra Ísraels.
„Alríkisstjórnin hefur aftur á móti heimild til þess og ég óska eftir að þau taki höndum saman með ICC og framfylgi þessari handtökuskipun,“ sagði Mamdani í myndbandsávarpi sem hann sendi frá sér í gær.
Hann sagði stjórn sína hafa kannað allar mögulegar leiðir til að framfylgja handtökuskipuninni ef Netanjahú kæmi til New York. Ljóst væri að samkvæmt gildandi lögum gætu borgaryfirvöld ekki gert það.
Forsetar Bandaríkjanna virða ekki handtökuskipunina
Í nóvember 2024 gaf ICC út handtökuskipunina. Í tilkynningu dómsins sagði að hann hefði gilda ástæðu til að saka Netanjahú um glæpi gegn mannkyni og stríðsglæpi í árásum Ísraelshers á Gaza eftir hryðjuverkaárás Hamas-samtakanna í Ísrael 7. október 2023.
Eftir að handtökuskipunin var gefin út hafnaði Joe Biden, þáverandi forseti Bandaríkjanna, skipuninni og sagði hana svívirðilega. Bandaríkin myndu alltaf standa með Ísrael.
Donald Trump forseti Bandaríkjanna sagði á mánudag að Netanjahú yrði ekki handtekinn ef hann myndi sækja allsherjarþing Sameinuðu þjóðanna í New York í september.
Skrifstofa Netanjahús segir ICC vera sýndardómstól
„Tortímingin sem hann hefur unnið er öllum ljós,“ sagði Mamdani í myndbandsávarpi sínu.
„Ég er sammála ICC um að Benjamín Netanjahú eigi að vera handtekinn og að réttað skuli yfir honum fyrir glæpi hans, og það sama á við um alla sem sæta ásökunum af hálfu ICC,“ bætti Mamdani við.
Skrifstofa Netanjahús hefur vísað orðum Mamdanis á bug og sagt Alþjóðlega sakamáladómstólinn vera sýndardómstól.
