Allsherjar- og menntamálanefnd vill að fólk verði að sækja um ríkisborgararétt til Útlendingastofnunar áður en það sendir inn umsókn til Alþingis um að fá veittan ríkisborgarrétt með lögum.
Nefndin hefur lagt fram tillögu til þingsályktunar um að dómsmálaráðherra verði látinn skoða lög og framkvæmd vegna veitingar ríkisborgararéttar. Nefndin vill tryggja að skýrt verði hvernig ríkisborgararéttur er veittur með lögum frá Alþingi og með stjórnvaldaákvörðun Útlendingastofnunar, einnig að ljóst sé hvernig mörkin og samspilið milli þessara leiða eru.
Tvær leiðir eru færar til að fá íslenskan ríkisborgararétt. Önnur er að sækja um til Útlendingastofnunar, hin að sækja um hann til Alþingis. Þingnefndin vill að báðar leiðir verði áfram færar en að fólk verði alla jafna að nýta stjórnsýsluleið Útlendingastofnunar áður en það leitar til Alþingis.
Umsóknum til Alþingis um ríkisborgararétt hefur fjölgað mikið hin síðari ár. Frá 2011 til 2016 voru umsóknirnar um hundrað talsins ár hvert. Síðustu ár hafa umsóknirnar oftast verið 200 til 300 talsins en tvisvar, á yfirstandandi þingi og 2018/2019, voru umsóknirnar á fimmta hundrað talsins.
