Kristrún deilir færslu um heimsóknina ásamt mynd af þeim tveimur meðal annars á Instagram-síðu sinni. Hún segir þær hafa farið um víðan völl yfir kaffibollanum. Þær hafi rifjað upp sögur úr forsetatíð Vigdísar og rætt málefni líðandi stundar.
Kristrún segir sérstaklega gaman að geta sýnt Vigdísi nýuppgerðan Ráðherrabústaðinn en framkvæmdir við hann hófust árið 2023 og stóðu yfir í rúmlega tvö og hálft ár.
Í dag eru fjörutíu og sex ár liðin frá því að Vigdís var kjörin forseti Íslands. Kristrún segir kjörið árið 1980 hafa verið sögulegt.
„Ekki bara fyrir Ísland heldur heimsbyggðina alla. Fram var kominn sannur brautryðjandi og firnasterkur leiðtogi, sem enn þann dag í dag er sú fyrirmynd sem íslenskar konur líta einna helst upp til. Slík arfleið er sannarlega ekki sjálfgefin,“ segir forsætisráðherra í færslunni.
