Tvær stúlkur af sómölskum uppruna hafa verið dæmdar eftir að 13 ára stúlka var barin tvisvar sama dag í Osló. Árásirnar voru teknar upp og upptökunum dreift áfram. Í hópnum voru allt að 15 til 20 stúlkur, samkvæmt frásögn norska blaðamannsins Espens Teigens hjá Document.
Málið varpar ljósi á ofbeldi sem einnig er til rannsóknar í Danmörku. Blaðamenn Berlingske notuðu gervi samfélagsmiðlaaðgang og fundu að minnsta kosti 58 myndbönd þar sem börn og ungmenni eru barin, þeim hótað eða þau niðurlægð fyrir framan myndavélina. Upptökunum er síðan dreift á TikTok, Snapchat og Telegram.
Fundu hana aftur meðan hún beið eftir hjálp
Árásirnar áttu sér stað 12. apríl 2025 og dæmdu stúlkurnar voru þá 15 ára en dómur var kveðinn upp 28.september.
Í fyrri árásinni lá þolandinn í fósturstellingunni og reyndi að verja höfuðið meðan högg og spörk dundu á henni. Aðrir viðstaddir tóku upp ofbeldið. Á upptöku heyrist stúlka hvetja aðra til að berja hana fastar.
Stúlkan hringdi í stjúpföður sinn. Um tveimur klukkustundum síðar fundu árásarmenn hana aftur með staðsetningarappi, þar sem hún beið eftir honum við Aker Brygge. Hún var dregin niður á hárinu og aftur barin og sparkað í hana.
Refsingarnar mildaðar vegna tafa
Önnur dæmdu stúlknanna tók þátt í báðum árásunum og hlaut átta mánaða „ungmennarefsingu“. Hin fékk 60 daga skilorðsbundinn fangelsisdóm fyrir þátt sinn í fyrri árásinni. Samkvæmt Document lækkaði dómstóllinn refsingarnar vegna þess hve lengi málið hafði dregist.
Ungmennarefsingin felur í sér að starfsfólk fylgir eftir mætingu hennar í skóla og uppfylling á öðrum skyldum sem dómurinn leggur fyrir samkvæmt einstaklingsbundinni áætlun, svo sem um meðferð eða aðrar aðgerðir til að koma í veg fyrir frekari brot.
Ofbeldið tekið upp til að sýna að fórnarlambið sé „veikburða“
Teigen greinir frá því að ein dæmdu stúlknanna hafi lýst upptökum af ofbeldi sem algengu fyrirbæri í Osló. Tilgangurinn væri að sýna að fórnarlambið væri veikburða.
Þolandinn sagði dreifingu myndbandsins hafa gert ofbeldið enn verra. Hún vildi ekki verða þekkt sem stúlkan á ofbeldismyndbandinu.
Falskur aðgangur opnaði leið að 58 myndböndum
Berlingske rannsakaði sambærilegar niðurlægingarupptökur í Danmörku. Blaðamennirnir þóttust vera 18 ára einstaklingur í leit að grófu efni á samfélagsmiðlum og fengu þannig fljótt aðgang að að minnsta kosti 58 myndböndum. Í umfjölluninni er meðal annars lýst börnum sem eru þvinguð til að segja niðrandi hluti um sjálf sig og fjölskyldur sínar. Gerendurnir eru oft sjálfir börn, að sögn eins blaðamannanna sem vann að rannsókninni.
Fyrirsögn Berlingske dregur fram skipanir sem heyrast í efninu: „Segðu að þú sért hóra“ og „kysstu skóinn minn“.
Í einu myndbandanna horfir óttasleginn drengur í myndavélina, biðst afsökunar og lokar augunum. Þá er hann sleginn í andlitið.
