Gistinóttum á íslenskum hótelum fækkaði um 2,5 af hundraði í ágúst samanborið við sama tíma í fyrra.
Samkvæmt bráðabirgðatölum Hagstofu Íslands um ferðaþjónustu á Íslandi voru gistinæturnar rúmlega 653 þúsund á landsvísu samanborið við tæplega 670 þúsund á sama tíma í fyrra.
Fyrstu átta mánuði ársins voru gistinætur samanlagt 0,3 prósentum færri en á sama tíma 2025. Fækkunin var mest á höfuðborgarsvæðinu eða 5,3 prósent, 3,6 prósent á Austurlandi og um 3,2 prósent á Suðurlandi.
Gistinóttum fjölgaði um tæp sjö af hundraði á Vesturlandi og 4,3 prósent á Vesturlandi og Vestfjörðum auk þess sem lítils háttar aukning varð á Norðurlandi. Framboð hótelherbergja jókst um 1,7 prósent í ágúst.
Um það bil 607 þúsund gistinótta á hótelum má rekja til útlendinga og rúmlega 226 þúsund þeirra voru Bandaríkjamenn. Samanlögð fækkun nemur 1,8 prósentum en Bandaríkjamönnum fjölgaði um rúmlega tíu af hundraði.
Heldur fjölgaði í hópi kínverskra ferðamanna á hótelum landsins, eða um 6,5 prósent á sama tíma og Þjóðverjum og Ítölum fækkaði um tæp tíu og rúmlega ellefu prósent. Íslendingar nýttu sér hótelgistingu tíu prósentum minna í liðnum ágúst en fyrir ári.
