Aðskilnaðarsinnar Túarega og herskáir íslamistar í Malí hafa náð völdum í bænum Kidal norðarlega í landinu, sem gegnir lykilhlutverki í stjórnsýslu norðurhlutans.
Þetta segja bandamenn héraðsstjórans sem flúið hefur bæinn undan árásum hópanna tveggja, sem hafa það að markmiði að skilja sig frá stjórnvöldum í Malí og stofna sjálfstætt ríki í norðurhluta landsins.
„Við erum farin frá Kidal. Við erum ekki lengur þar. Það eru jíhadistarnir og FLA [Frelsisher Azawad] sem eru í Kidal,“ segja heimildamenn sem til þekkja við AFP.
Íbúar á svæðinu segjast hafa séð hermenn malíska hersins hörfa úr bænum ásamt rússneskum málaliðum sem starfað hafa náið með herforingjastjórn landsins um hríð.
Enn hefur ekkert spurst til Sadio Camara, leiðtoga herforingjastjórnarinnar, eftir að samhæfðar árásir vígahópanna tveggja hófust fyrir fáeinum dögum. Á laugardag drápu þeir varnarmálaráðherra landsins í bílsprengju.
Fregnir herma að Camara sé í höfuðborginni Bamako, en það að hann komi ekki fram opinberlega er sem olía á eldfimt ástand sem verið hefur í landinu síðustu daga.
Herskáir íslamistar hafa árum saman haft tögl og hagldir í norðurhluta Malí og gert líf íbúa þar nær óbærilegt með sprengjutilræðum, skotárásum og öðrum ódæðum.
Hið sama gildir um nágrannaríki til austurs og vesturs, þar sem vígamenn ráðast oft til atlögu gegn íbúum. Þessi heimshluti, Sahel-svæðið, hefur fyrir vikið hlotið viðurnefnið valdaránsbeltið í kreðsum stjórnmálafræðinga og diplómata á síðustu árum.
Hin ríkin sem jafnan eru talin upp líka eru Níger, Búrkína Fasó, Tsjad og Gínea, þar sem valdarán hafa verið tíð síðustu ár.
