Maður sem átti í viðskiptum við leigufélagið Sólarmegin, sem leigði út íbúðir á Spáni, segist hafa tapað um þremur milljónum króna. Hann greiddi ársleigu fyrirfram og segir að aldrei hafi verið staðið við loforð.
Gekk mjög vel í fyrstu
Fréttastofa greindi frá því í gær að að minnsta kosti tíu Íslendingar hefðu lent í vandræðum eftir að hafa leigt íbúðir á Spáni af leigufélaginu Sólarmegin. Fólkið greiddi stórfé en fékk ekki húsnæðið vegna þess að móðurfélag Sólarmegin er komið í greiðslustöðvun.
Halldór Svavarsson segist hafa haft góða reynslu af fyrirtækinu í upphafi. Hann leigði íbúð á Playa Flamenca á Alicante í stuttan tíma fyrir tveimur árum.
„Ég hafði fyrst samband við þá 2024 og þá útveguðu þeir mér íbúð í stuttan tíma og allt gekk bara mjög vel.“
Hann ákvað því að leigja aftur af félaginu, þá á og þá í eitt ár. Hann fór fram á að borga leiguna fyrirfram.
„Ég er öryrki og þetta hefði komið sér bara vel fyrir mig að þurfa ekki að greiða leigutekjur mánaðarlega af örorkubótunum. Og jú, jú það gekk erfiðlega fyrst og hann lofaði mér afhendingu á húsnæði í maí í fyrra og það hérna klikkaði.“
Halldór á tvo drengi sem ætluðu að dvelja hjá honum á Spáni. Þegar ekkert bólaði á íbúðinni segist Halldór hafa verið nauðbeygður til að taka aðra íbúð sem félagið útvegaði í Lorca í Murcia á suðaustur Spáni.
„Og hann var alltaf að lofa mér í raun og veru afhendingu á einhverju húsnæði á einhverjum tíma sem stóðst svo aldrei.“
Halldór segir að leigusamningurinn hafi verið á spænsku. „Ég skildi ekkert samninginn og hann gat ekkert þýtt hann fyrir mér, þessi sem var að afhenda mér lykla og annað. Það tók alveg tvær vikur að fá íslenska þýðingu af samningnum.“
Þá kom í ljós að samningurinn var ekki í samræmi við það sem ákveðið hafi verið í upphafi. „Ég var búinn að borga 18.200 evrur fyrir eitt ár. En það kom fram í samningnum að ég ætti að borga 18 þúsund evrur, jú heildarupphæðin, en alltaf í mánaðarlegum greiðslum, sem var náttúrulega ekki rétt.“
Það var ekki það sem þið voruð búnir að semja um í upphafi?
„Nei, það var ekki það sem við vorum búnir að tala um og ég var náttúrulega löngu búinn að greiða þessar 18 þúsund evrur til hans.“
Ekkert ákvæði var um endurgreiðslu ef samningnum yrði rift eða hann þyrfti að rifta samningnum fyrir lok leigutímans. „Eins og ég var búinn að tala um við hann. Það stóðst ekkert í því og hann lofaði alltaf að því yrði breytt.“
Búinn að reyna að fá um tvær milljónir endurgreiddar
Í lok sumars í fyrra, þegar Halldór var að fara með drengina aftur til Íslands, hafði ákvæðinu ekki enn verið breytt í leigusamningnum. Meðan hann var hér á landi lést barnsmóðir hans skyndilega eftir stutt veikindi.
Halldór fór þá aftur til Spánar, pakkaði búslóðinni niður og setti í geymslu og kom aftur til landsins til að sjá um drengina.
„Síðan þá er ég búinn að reyna að fá endurgreidda þessa upphæð, sem var eitthvað í kringum 14 þúsund evrur.“
Það er jafnvirði um tveggja milljóna króna, upphæðin sem var eftir af leigusamningnum þegar Halldór þurfti að fara til Íslands.
Hann segist síðan hafa reynt að fá eftirstöðvarnar af leigunni endurgreiddar. Núna í sumar segist hann síðan hafa gert samkomulag við eiganda Sólarmegin um að fá fría gistingu í sumar upp í fjárhæðina.
„Ég margfékk hann til að staðfesta það við mig áður en ég fór að bóka ferð með Norrænu, ég tók bílinn minn með mér, og jú, jú hann var klárlega með hús fyrir mig. Svo þegar ég er að keyra í gegnum Frakkland í sumar þá er hann ekki enn búinn að staðfesta við mig nákvæmlega hvar ég eigi að hitta hann og hvenær ég eigi að taka við húsinu.“
Halldór byrjaði því á því að leigja húsnæði á AirBnB. „Svo gekk þetta bara svona í allt sumar. „Þetta er alltaf að gerast, þetta er alltaf að gerast, þetta er alltaf að fara að koma“ og svo svaraði hann engu. Einhvern veginn í lok sumars var ég að verða búinn að eyða öllu sparifénu mínu í gistingu og ekki kannski búinn að ná að gera það sem ég vildi gera með drengjunum mínum.“
„Hann er enn þá að lofa“
Halldór er kominn aftur til Íslands núna og hefur verið í sambandi við eigandann síðustu daga.
„Rétt áður en ég fer heim frá Spáni þá hefur hann samband við mig og enn eina ferðina lofar hann öllu fögru. Hann lofaði mér sem sagt að hann myndi endurgreiða mér útlagðan kostnað í sumar út af því að hann hafði svikið mig. Mánaðarmótin ágúst, september ætlaði hann að borga mér sjö þúsund evrur, milljón, og hann náttúrulega stóð ekki við það.“
Halldór segist hafa reynt að vera í góðum samskiptum við manninn en endaði á því að senda honum kröfubréf. Hann hefur ekki enn greitt honum neitt.
„En hann er alltaf að lofa og hann er enn þá að lofa og bara síðast í gær hafði hann samband við mig.“
Segist vera með mjög sterkt mál í höndunum
Hann segist vera löngu hættur að hafa trú á því að hann fái eitthvað af peningnum til baka, sérstaklega eftir fréttir síðustu daga.
„Síðan ég kom heim til Íslands [fyrir ári síðan] þá er bara einhvern veginn allt búið að vera í hers höndum út af viðskiptum við hann.“
Halldór telur sig hafa tapað að minnsta kosti þremur milljónum króna.
„Hjá mér er þetta ábyggilega í kringum þrjár milljónir eða meira, sem ég hef tapað á þessu.“
Hann segir mikla óvissu vera um hvernig framhaldið verði.
„Til þess að byrja með ætla ég bara að fylgjast með Lögbirtingablaðinu. Ef þetta félag hans er tekið til gjaldþrotaskipta þá allavega set ég kröfu inn í félagið. Maður veit svo sem ekkert hvernig maður getur snúið sér í þessu. Eins og ég segi, maður er öryrki og ég er ekki mjög fjáður. Að fara í lögfræðinga er mjög dýrt.“
Halldór segist hafa haldið vel utan um öll gögn, hann eigi samskipti þeirra, bæði í tölvupósti og á WhatsApp, sem og samninga sem er misræmi í. „Mér er sagt að ég sé með mjög sterkt mál gagnvart honum en eins og ég segi, kostnaðurinn að fara út í það er aftur á móti mikill.“
