„Við vorum átta manns sem smituðumst og allt starfsfólkið var beðið um að fara í blóðprufu,“ segir Atli Dagur Sigurðsson, hjúkrunarfræðingur á bráðamóttöku Landspítalans, í samtali við mbl.is um berklasmit sem hann varð fyrir á vinnustað sínum og fjallað hefur verið um hér á mbl.is.
Í kvöld lýkur Atli Dagur lyfjameðferð síðustu 120 daga sem ekki hefur reynst honum þægileg og ýmsar aukaverkanir fylgt. Hann skrifar um síðustu töfluna á Facebook-síðu sinni:
Í kvöld tek ég síðustu Rimactan töfluna við berklum. 120 dagar, 4 mánuðir. Allskonar aukaverkanir. Þetta er loksins búið eða hvað? Ég get mætt í vinnuna í næstu viku og smitast aftur af berklum. Ég velti því fyrir mér hvað hafi breyst frá stóra fundinum sem bráðamóttakan hélt fyrr á árinu á Grand hótel sem vakti mikla athygli og umræðu í fjölmiðlum.
Atli heldur nefnilega að ekkert hafi breyst skrifar hann í framhaldinu. Ástandið sé óbreytt.
Meðferðin engin skemmtun
„Við sem greindumst erum með einkennalausa berkla, latent berkla eins og þeir kallast,“ segir hjúkrunarfræðingurinn, „sem þýðir að það ferli fór af stað að hitta smitsjúkdómalækni, fara í fleiri prufur og röntgenmynd, svo bara að hefja meðferð,“ heldur hann áfram.
Meðferðin, sem nú er að ljúka, var allt annað en skemmtileg. „Þetta eru rótsterk sýklalyf sem fara ekkert sérstaklega vel í líkamann, það er mismunandi hvernig fólk bregst við, ég fékk mikla kviðverki og fann fyrir miklu orkuleysi en svo dró úr einkennum. Eins minnka þessi lyf áhrif annarra lyfja ef verið er að taka þau,“ útskýrir hjúkrunarfræðingurinn.
Hann segir málið grafalvarlegt. „Berklar eru í líkamanum ef ekkert er gert. Verði ég einhvern tímann ónæmisbældur og hefði ekki tekið þennan lyfjakúr geta berklarnir orðið virkir. Fengi ég til dæmis krabbamein og fengi ónæmisbælandi lyf þyrfti ég að byrja á þessum lyfjum áður en ég færi krabbameinslyf,“ segir hann.
Lifrarbólga ein aukaverkana
Helsta aukaverkun þessa sterka sýklalyfjakúrs er lifrarbólga og nú þarf Atli að kanna hvort hann sé með hana og fer í þá blóðprufu á þriðjudaginn og í framhaldinu viðtal á göngudeild smitsjúkdóma.
Drjúgur hluti pistils Atla snýst hins vegar um ástandið á Landspítalanum í Fossvogi, sem löngum hefur verið til umræðu, sjúklingar um alla ganga með tilheyrandi smithættu – sem glöggt má sjá af þessu máli – jafnvel í bílageymslu auk þess sem fólk bíður sólarhringum saman á bráðamóttökunni.
Eru fjölmiðlar hættir að ýta á eftir svörum hvað á að gera fyrir heilbirgðiskerfið? Er þetta bara gleymt og grafið? Er krísan yfirstaðin hjá yfirvöldum og þurfa ekki að svara fyrir þetta lengur? Eigum við bara að halda áfram að hlaupa hraðar? Á ég eða aðrir að greinast aftur með berkla?
Atli skefur ekki af því enda kannski ástæða til að láta vaða á súðum.
„Við erum að kalla eftir einhverju“
„Þetta er náttúrulega ekki gott og eins og ég nefndi í þessum pistli vorum við með þennan stóra fund á Grand hóteli þar sem við nefndum að smitvarnir spítalans eru litlar sem engar þegar hann er yfirfullur. Þetta flæði hættir ekkert, bráðamóttakan er alltaf yfirfull. Ástæðan fyrir að ég set þennan pistil fram er að við erum að kalla eftir einhverju, við erum að kalla eftir því að hlutirnir verði lagaðir, hvernig sem þeir verða lagaðir, og fólk geti fengið þá þjónustu sem það þarf á að halda. Við erum með fólk í hverju horni, aldrað fólk, bráðveikt fólk. Kerfið er bara sprungið og þá getum við ekki unnið okkar vinnu, við getum ekki tryggt öryggi sjúklinga og við getum ekki haft bráðastæðið laust,“ segir Atli.
Hvað segja stjórnendur sjúkrahússins við ykkur?
„Þetta er mjög erfitt fyrir Landspítalann líka, einhvers staðar verður kerfið bara stopp, spítalinn verður yfirfullur. Það er erfitt fyrir stjórnina að grípa alltaf í einhverja tauma. Þau eru með einhverjar bráðabirgðalausnir sem munu eflaust eitthvað hjálpa en það er bara ekki nóg,“ svarar hann og kemur að því sem hann telur kjarna málsins.
„Ríkisstjórnin þarf að fara að grípa boltann og gera eitthvað í þessu, þetta mun annars bara versna, við erum orðin miklu fleiri í samfélaginu og þjóðin er að eldast. Fólk verður bara lasnara og lasnara. Hver einasti alþingismaður á einhvern að sem þarf á heilbrigðisþjónustu að halda og einhvern tímann þurfa þau í ríkisstjórninni líka á þjónustu að halda. Þetta snertir okkur öll og mér líður bara eins og sé verið að gera þetta viljandi,“ segir Atli og talið berst að nýjum Landspítala og hvort hann bjargi ekki einhverju.
Fá ekki þjónustu annars staðar
„Núna er vitað fyrir fram að hann verður ekki nóg. Þetta er ekki bara á spítalanum, þetta er líka í þjónustunni í kringum spítalann, hún þarf að virka, heilsugæslur og annað. Fólk er að flykkjast á bráðamóttökuna vegna þess að það fær ekki þjónustu annars staðar. Það vantar hjúkrunarheimili, mörg. Fólk fær ekki færni- og heilsumat staðfest og þegar það fær það staðfest er það samt að bíða eftir að komast inn á hjúkrunarheimili. Þetta mun snerta mig og þig í framtíðinni og þetta eru hlutir sem áttu að gerast fyrir 20 árum og við erum enn að klikka á þessu,“ segir hann enn fremur.
Atli segir fundinn á Grand hóteli hafa vakið athygli en eftir hann hafi verið farið að tala um krísustjórnun. „En það er enginn að reyna neitt, það er bara verið að bíða eftir að þessi umfjöllun sé búin og þá sé hægt að bola þessu burt aftur. Ég er að tjá mig til að minna á að þetta verður að gera,“ segir Atli.
Talið berst að viðtali við þá Hilmar Kjartansson bráðsérfræðing í Læknablaðinu þar sem þeir sögðu að þjóðarsáttmála þyrfti um vanda heilbrigðiskerfisins, yfirvöld yrðu að axla ábyrgð „og það er óháð því hver er að stjórna og hvaða flokkar eru í ríkisstjórn. Það verður bara að vera framtíðarplan um hvernig eigi að byggja heilbrigðiskerfið upp og því plani á ekkert að breyta, það á bara að halda því gangandi. Það er miklu dýrara fyrir ríkið að hafa allt þetta fólk endalaust á spítalanum þangað til það fær pláss á hjúkrunarheimili frekar en að byggja upp heilbrigðiskerfið,“ segir viðmælandinn.
Atli beinir nú máli sínu til ríkisstjórnarinnar sem hann biður um að bretti upp ermarnar.
„Búið til plan, leggist nú í þetta og gerið þetta, þetta snertir ykkur líka, ykkur á Alþingi, ykkur í ríkisstjórn, þetta snertir ykkur öll, þetta snertir okkur öll,“ segir Atli Dagur Sigurðsson hjúkrunarfræðingur að lokum.
