Frá og með deginum í dag mega allir gefa blóð óháð kyni eða kynhneigð. Hingað til hafa samkynhneigðir karlar á Íslandi ekki mátt gefa blóð þar sem þeir voru flokkaðir í áhættuhóp með tilliti til blóðgjafar.
„Við höfum beðið eftir þessum degi í áratugi,“ segir Albert Eiríksson um tímamótin. Fréttastofa fylgdi þeim Alberti og Bergþóri Pálssyni í Blóðbankann í dag.
Í fyrstu heimsókn í Blóðbankann tekur hjúkrunarfræðingur á móti blóðgjöfum og fer yfir spurningar um þætti sem hafa áhrif á blóðgjöf, þar á meðal heilsufar, lyfjanotkun, ferðalög, húðflúranir og gatanir svo eitthvað sé nefnt.
Eftir að rannsókn er lokið á blóðinu getur fyrsta blóðgjöf svo farið fram, tveimur til þremur vikum eftir fyrstu heimsókn.
„Í dag er sannkallaður gleðidagur“
„Ég er reyndar vanur blóðgjafi, frá því á árum áður. Ég vissi alveg á hverju ég átti von,“ segir Bergþór eftir að hann hafði lokið blóðprufu.
Blóðbankinn hefur tekið í notkun nýtt einstaklingsbundið áhættumat sem snýr að smitvörnum. Það gerir öllum kleift að gefa blóð. Þetta er þýðingarmikil breyting að mati Alberts.
„Svo er þetta líka réttindamál homma og þeir eru búnir að berjast fyrir þessu í áratugi, að gefa blóð. Það eru ekki mörg ár síðan lesbíur fengu að gefa blóð en hommar hafa þurft að berjast fyrir þessu. Í dag er sannkallaður gleðidagur,“ bætir Albert við.
Þeir Albert og Bergþór gera ráð fyrir að þeir verði fastagestir í Blóðbankanum. Svo skemmir ekki fyrir að fá gott kaffi og kökur að blóðgjöf lokinni, segir Albert.
