Allir fimm stjórnarmenn Landsvirkjunar sátu fundinn, samkvæmt fundargerð fjármálaráðuneytisins frá 6. janúar sem Vísir hefur fengið afhenta. Daði sagði á Alþingi að fundurinn hefði verið boðaður til að ræða stjórnun og eigendastefnu. Hann hefði nýtt tækifærið til að spyrja um greiðsluna og stöðu samskipta Landsvirkjunar og Landsnets.
Til stóð að Hörður hitti Daða daginn eftir ásamt formanni og varaformanni stjórnar. Það kemur fram í tölvupóstsamskiptum Landsvirkjunar og ráðuneytisins frá 15. og 16. desember sem Vísir hefur undir höndum. Af þeim fundi varð ekki. Í tölvupósti sem Hörður sendi Daða 26. október sagði hann að ætlunin hefði verið að ræða áhyggjur af breyttum samskiptum Landsvirkjunar og ráðuneytisins.
Kallaði spurningarnar pólitísk afskipti
Guðlaugur Þór Þórðarson, þingmaður Sjálfstæðisflokksins, kallaði spurningar ráðherrans pólitísk afskipti þegar hann ræddi málið á þingi í dag. Hann sagði Daða hafa getað aflað upplýsinga um greiðsluna með öðrum hætti og spurði hvers vegna ráðherrann hefði ekki sagt þinginu frá spurningunum þegar málið var áður rætt þar.
Daði sagðist hafa spurt „einungis í upplýsingaskyni“. „Að spyrja spurninga varðandi reksturinn er eðlilegur hluti af þeim fundum,“ sagði hann.
Ríkið fékk kaupverðið að láni
Landsvirkjun framleiðir rafmagn og Landsnet rekur flutningskerfið sem flytur það um landið. Í lok árs 2022 seldi Landsvirkjun ríkinu tæplega 65 prósenta hlut sinn í Landsneti fyrir um 44 milljarða króna á þáverandi gengi. Markmiðið var að aðskilja eignarhald flutningskerfisins frá raforkuframleiðendum.
Landsvirkjun lánaði ríkinu fyrir kaupverðinu. Í árslok 2025 námu eftirstöðvar lánanna um 25 milljörðum króna og áttu að greiðast á árunum 2026 og 2027. Í fundargerðinni frá 6. janúar segir að skuldabréfið vegna sölunnar hafi verið rætt í tengslum við arðgreiðslur. Engin tillaga var lögð fram.
Ágreining félaganna bar á góma
Í sömu fundargerð segir að Daði hafi talið óheppilegt að ágreiningur af þessu tagi birtist í fjölmiðlum. Stjórnin tók undir það og Brynja Baldursdóttir stjórnarformaður sagði fyrirtækin ræða sín á milli þau ágreiningsmál sem væru uppi hverju sinni.
Hörður hafði í nóvember 2025 gagnrýnt há flutningsgjöld Landsnets í viðtali við Innherja og sagt þau ógna samkeppnishæfni Íslands. Ragna Árnadóttir forstjóri Landsnets sagði við Innherja tveimur dögum síðar að sterk fjárhagsstaða félagsins gerði því kleift að fjárfesta í flutningskerfinu. Fundargerðin tilgreinir ekki hvort Daði hafi átt við þá umræðu.
Segir ráðuneytið leggja fram öll sín gögn
Sigríður Á. Andersen, þingmaður Miðflokksins, spurði Daða hvort réttlætanlegt hefði verið að funda án Harðar og hvort hann myndi beita sér fyrir því að Alþingi fengi tölvupósta og fundargerðir frá ráðuneytinu og Landsvirkjun. Daði sagði Hörð hafa verið boðaðan á alla fundi nema tvo sem ráðherrann átti með stjórninni samkvæmt starfsreglum hennar.
Daði sagði ráðuneytið myndu leggja fram öll gögn sem það hefði um málið. Hann sagði aðrar reglur gilda um innri samskipti og fundargerðir Landsvirkjunar og kvaðst ekki geta fullyrt hvort hægt yrði að afhenda þau gögn.
