Þetta segir Jón Tryggvi Þórsson, eigandi Gullsmiðsins í Mjódd, í samtali við fréttastofu. Brotist var inn í verslunina í Breiðholti í Reykjavík um miðnætti í nótt. Allavega tveir menn fóru þar um í skjóli nætur, brutu sér leið inn í verslunina og tóku þar allt gull og verðmætustu skartgripina ófrjálsri hendi. Tjónið nemur um 30 milljónum króna að sögn eigandans.
Þegar fréttastofu bar að garði var eigandinn ásamt starfsfólki búinn að hreinsa upp urmul af glerbrotum sem voru á víð og dreif um verslunina. Einnig var búið að loka fyrir sýningargluggann þar sem innbrotsþjófarnir komu inn. Viðtalið má berja augum í spilaranum hér að neðan.
„Þeir hafa komið hérna einhverjir tveir aðilar, það náðist myndband af þeim, þeir komu um tólfleytið í nótt. Þeir brutu hérna rúðuna, hér var útsýnisgluggi með fullt af skarti. Þeir stálu því og fóru til baka en sáu sér hag í að koma aftur og enduðu á því að fara inn í alla búðina. Þeir brutu allt og brömluðu og stálu öllu gullinu.“
Hann segir verknaðinn hafa verið þaulskipulagðan. Öryggiskerfið hafi af einhverjum ástæðum ekki farið í gang.
„Það er það sem við erum að reyna að skilja núna. Þeir höfðu þann tíma sem þeir vildu til að dúlla sér hérna inni í búðinni. Ég fæ ekki að sjá myndbandið sjálfur en mér skilst að þeir hafi verið tveir. Þeir sáust síðast klukkan hálf tvö í nótt,“ segir hann en þeir hafi því verið í um 90 mínútur allt í allt í versluninni.
Hann stefnir á að reyna að opna verslunina sem fyrst og selja það sem eftir er. Vonir eru bundnar við að geta opnað á morgun enda fer nú í hönd stærsta verslunartímabil ársins. Stórir tilboðsdagar eru fram undan og fer að líða að jólum.
„Þetta er korter fyrir jól sem er annasamasti tími ársins. Þetta er svolítið illa tímasett hjá þeim. Þetta er allra versti tíminn. Við erum bara í því að hreinsa og síðan þurfum við að fá nýtt gler,“ segir hann og telur að það verði vandkvæðum bundið að tryggja sér nýtt gull til að geta sett nýja gripi í sölu.
Hann telur að innbrotsþjófarnir hafi skriðið eftir gólfinu til að koma í veg fyrir að virkja nemann sem setur öryggiskerfið af stað.
„Þeir skriðu síðan aftur út um gluggann. Þeir hafa greinlega haft mikið vit á þessu. Þetta eru svona prófessjonal gæjar.“
Hann biðlar til fólks að vera með augun opin fyrir þeim sem reyna að selja verðmæti úr gulli. Allar ábendingar til hans eða lögreglunnar séu vel þegnar.
Jón er í raun nýbúinn að koma sér fyrir en hann tók við versluninni í vor.
„Ég lærði hérna fyrir 36 árum. Ég tók við og ákvað að eyða seinni árunum í gullinu. Þetta kemur. Maður lætur þetta ekki slá sig út af laginu. Maður verður bara að bíta á jaxlinn og finna einhverja leið til að halda áfram.“
Verslunin sé tryggð fyrir tjóni en hann kveðst ekki vongóður um að fá það að fullu bætt.
„Ég uppgötvaði þetta bara með morgunbollanum. Maður verður fyrst smá dofinn en síðan rennur þetta upp hægt og rólega.“
