Breski grínistinn og leikarinn Russell Brand hefur verið dæmdur í tíu og hálfs árs fangelsi fyrir nauðgun og kynferðisbrot. Hann var sakfelldur í fjórum ákæruliðum í síðustu viku.
Þolendur Brands sögðust allar enn glíma við afleiðingar brotanna. Þær lýstu jafnframt mikilli streitu sem fylgdi því að fara með málið fyrir dómstóla til að leita réttar síns.
Dómsuppkvaðningin hófst rétt fyrir klukkan ellefu í morgun. Þá voru lesnar upp yfirlýsingar þolenda Brands. Dómari tók þær til greina þegar hann ákvað fangelsisdóminn. Stutt hlé var gert á dómsuppkvaðningunni áður en henni var sjónvarpað í beinni útsendingu klukkan 14.
Brand þarf að afplána að minnsta kosti tvo þriðju hluta dómsins áður en hann getur sótt um reynslulausn. Það eru tæplega sjö ár.
Sakfelldur fyrir nauðgun og kynferðisofbeldi
Brand er 51 árs og varð frægur fyrir framkomu í útvarpi, sjónvarpi og síðar sem leikari í kvikmyndum. Hann var sakaður um nauðgun og kynferðisofbeldi gegn sex konum, á tíu ára tímabili. Ákæran var í sjö liðum en hann neitaði alfarið sök.
Brand var sakfelldur fyrir að nauðga ungri konu eftir uppistandssýningu í vesturhluta Lundúna 2009 og í þremur ákæruliðum fyrir kynferðisofbeldi. Brotin áttu sér stað á árunum 2004 til 2009.
Saksóknarar fóru fram á 10 til 15 ára dóm fyrir nauðgun og allt að fjögurra ára dóm fyrir kynferðisofbeldi.
Lýstu áhrifum brotanna fyrir dómi
Yfirlýsingar þolenda Brands voru lesnar upp við dómsuppkvaðninguna. Dómari tók þær til greina þegar hann ákvað fangelsisdóm.
Ein kvennanna las sína yfirlýsingu sjálf en Riel Karmy-Jones, saksóknari, las upp yfirlýsingar fyrir hönd hinna þriggja. Þolendur eiga rétt á ævilangri nafnleynd og því var blátt skilrúm sett upp og tjald dregið fyrir vitnastúkuna þannig að konan gæti lesið sína yfirlýsingu í persónu.
Konan sem las upp sína yfirlýsingu sagðist hafa verið í áfalli árum saman.
„Ég var afar miður mín og niðurbrotin. Ég bar enga virðingu fyrir sjálfri mér. Ég fór að líta á mig sem skemmda manneskju og var hrædd um að hegðun mín eða framkoma yrði misskilin.“
Hún sagði að sér hefði liðið líkamlega illa yfir því að sjá Brand í fjölmiðlum. Hún hefði fengið kvíðakast þegar hún hefði séð fréttir af málinu sínu á forsíðum dagblaða.
Konan endaði yfirlýsingu sína á því að benda á að maður breyti eðli sínu ekki svo auðveldlega. Dómarinn þakkaði henni fyrir að hafa hugrekki til að stíga fram.
Í yfirlýsingum hinna kvennanna kom fram að brotin hefðu haft varanleg áhrif á líf þeirra á meðan Brand hefði náð að halda áfram með sitt líf.
Í yfirlýsingu konu sem Brand var sakfelldur fyrir að beita kynferðisofbeldi kom fram að þegar hún hafi heyrt rödd hans eða séð hann í sjónvarpinu hafi henni brugðið mikil.
„Russell Brand er síbrotamaður sem sýnir enga iðrun. Ég vona að honum verði ekki gefið tækifæri til að gera fleiri konum mein.“
Í yfirlýsingu konunnar sem Brand var sakfelldur fyrir að nauðga kom fram að hún hafi átt erfitt með svefn, að borða og ráða við tilfinningar sínar eftir atvikið. Hún hefði þurft að taka sér leyfi frá vinnu og flutt aftur heim til foreldra sinna.
„Ég lifi með þessu áfalli og ber það með mér á hverjum degi.“
Lögregla býst við að fleiri konur stigi fram í kjölfar dómsins en Brand er einnig til rannsóknar vegna frekari ásakana tveggja kvenna um nauðgun.
Fréttin hefur verið uppfærð með upplýsingum um reynslulausn.
