Fyrstu gestirnir komu um hádegi. Lúðrasveit spilaði á kránni og fólk fékk sér snittur og veigar á meðan það beið eftir jólabjórnum. Um kvöldið var búið að loka götunni fyrir bílum og fólkið stóð þétt úti á miðri akbraut.
„Sumir eru komnir um hádegi og svo koma aðrir rétt fyrir níu. Við erum búin að vera með opið í næstum níu tíma þegar kemur að því sem allir eru að bíða eftir. Við áætlum að um eitt þúsund manns hafi verið fyrir utan krána klukkan níu þegar við opnuðum fyrir jólabjórinn en yfir það heila hafi um fimm þúsund manns lagt leið sína að Dönsku kránni yfir allan daginn,“ segir Baldur Búi Heimisson, rekstrarstjóri og einn eigenda Dönsku kráarinnar.
Mannhafið sem taldi niður áður en snjórinn féll náði frá kokkteilabarnum Daisey í Ingólfsstræti og alveg niður á húsinu þar sem veitingastaðurinn Sólon var eitt sinn.
„Áður fyrr náði röðin stundum út á götu og okkur fannst það mikið. Nú þarf að loka Ingólfsstræti. Mér finnst skemmtilegt að fólk geti bara komið við á röltinu og tekið þátt í J-deginum þótt það fari aldrei inn á krána,“ segir Þórdís Karen Þórðardóttir, einn eigenda kráarinnar.
Frá Danmörku til Ingólfsstrætis
Tuborg-jólabjórinn var fyrst fluttur til Íslands árið 1997 og Ölgerðin byrjaði að brugga hann hér árið 2011. Þá hafði J-dagurinn verið haldinn í Danmörku í rúma tvo áratugi. Á Dönsku kránni tóku eigendurnir upp siðinn árið 2010 að halda sérstaklega upp á daginn sem jólabjórinn fer á krana.
„Við erum með danska krá og okkur fannst þetta passa alveg við staðinn. Danir halda upp á það þegar jólabjórinn kemur og okkur langaði að prófa það hér. Þegar við héldum J-daginn í fyrsta sinn mættu um 100 manns,“ segir Þórdís Karen.
Einni mínútu fyrir miðnætti
Þegar Tuborg hélt fyrsta J-daginn í Danmörku árið 1990 fór jólabjórinn í sölu einni mínútu fyrir miðnætti. Dagurinn var þá haldinn á miðvikudegi. Árið 1999 var hann færður yfir á fyrsta föstudag í nóvember og farið að setja bjórinn á krana klukkan 20:59.
„Ég hef heyrt þá sögu að bjórinn hafi átt að fara á krana klukkan átta en menn hafi verið 59 mínútum á eftir áætlun. Svo hafi þeim bara þótt ágætt að hafa þetta svona áfram,“ segir Baldur.
Myndir sem Arnar Laufdal tók þetta kvöld má sjá hér fyrir neðan:
