Breska hirðin hefur í sex ár haft í fórum sínum tugþúsundir tölvupósta sem sýna að Andrew Mountbatten-Windsor, fyrrverandi Bretaprins, deildi viðkvæmum opinberum upplýsingum meðan hann var viðskiptaerindreki Bretlands. Þeir tengjast meðal annars föllnum íslenskum banka.
Í frétt breska ríkisútvarpsins BBC segir að breska hirðin hafi fengið tölvupóstana afhenta árið 2020. Þeir voru alls um 30.000 og ná aftur til ársins 2013.
Kaupsýslumaðurinn Kevin Stanford var einn stærsti viðskiptavinur og hluthafi Kaupþings fyrir hrun. Hann átti árið 2010 í harðvítugum deilum við feðgana og kaupsýslumennina Jonathan og David Rowland og þrotabú Kaupþings banka og lak tölvupóstsamskiptum Mountbatten-Windsor og Rowlands yngri til hirðarinnar.
Stanford neitaði að borga milljarða skuld við Kaupþing og sakaði stjórnendur bankans um svik og blekkingar til að fá hann til að kaupa hlutabréf í bankanum rétt fyrir hrun.
Þeir Rowland-feðgar höfðu tekið yfir og endurskipulagt starfsemi bankans í Lúxemborg, sem síðar varð Banque Havilland. Bresk stjórnvöld og Evrópusambandið beittu þá og bankann loks viðskiptaþvingunum.
Fyrr á þessu ári greindi The Telegraph frá því að Mountbatten-Windsor hefði 2010 beðið um að fá afhent leynilegt minnisblað breska fjármálaráðuneytisins um vandkvæði og stöðu Kaupþings og sent það rakleiðis til Jonathans Rowland.
Fengu póstana áður en rannsókn hófst
Æðsti embættismaður bresku konungsfjölskyldunnar fékk tölvupóstana í hendur löngu áður en yfirstandandi lögreglurannsókn á athæfi Mountbatten-Windsor hófst og þeir þykja sanna að prinsinn fyrrverandi hafi deilt trúnaðarupplýsingum sem erindreki Bretlands.
Ekki er vitað nákvæmlega hvað í þeim stendur en þeir teljast einnig sérstaklega mikilvægir í ljósi mjög umdeildra viðskipta Mountbattens-Windsor við Banque Havilland og Rowland-feðga. Í Epstein-skjölunum má sjá að prinsinn fyrrverandi kom þeim og fyrirtækjum þeirra af kappi á framfæri.
