Tugum þúsunda getur munað árlega á æfingagjöldum fyrir handbolta og körfubolta eftir félögum. Æfingagjöld í handbolta geta farið yfir 175 þúsund og í körfubolta geta þau farið yfir 180 þúsund. Frístundastyrkir sveitarfélaga duga mismikið eftir íþróttafélagi og búsetu.
Þetta kemur fram í samantekt ASÍ um æfingagjöld í handbolta og körfubolta hjá íþróttafélögum víða um land. Miðað var við tvöfalt haustgjald til að áætla árgjald. Í samanburðinum liggur ekki fyrir hvort vorönnin og haustönnin kosti það sama.
Þrír aldurshópar voru sérstaklega skoðaðir, 6 til 7 ára, 10 til 11 ára og 14 til 15 ára. Samkvæmt samantektinni er mikill verðmunur milli félaga og sveitarfélaga og kostnaður almennt meiri eftir því sem börnin verða eldri. Töluverður munur er á gjöldum jafnvel þegar börn á sama aldri eru borin saman.
Þór með lægsta gjaldið í öllum aldursflokkum
Þegar æfingagjöld í handbolta eru skoðuð kemur í ljós að Þór á Akureyri er með lægsta gjaldið í öllum þremur aldurshópum og KA með næstlægsta gjaldið. 69 þúsund krónur kostar fyrir 6 til 7 ára börn að æfa handbolta hjá Þór. Hæsta gjaldið er hjá Fram, 112.500 krónur. Þar munar 43.500 krónum á ári.
Hjá 10 til 11 ára börnum breikkar verðbilið. Þar er Þór með 85 þúsund króna gjald en Fram aftur hæst með 161.650 krónur. Munurinn er rúmlega 78 þúsund krónur.
Hjá 14 til 15 ára börnum er gjaldið einnig lægst hjá Þór, 105 þúsund krónur en hæst hjá Fram, 185.500 krónur. Fjölnir fylgir fast á eftir með 176.600 krónur og HK þar á eftir með 175 þúsund krónur.
Í samantekt ASÍ kemur fram að töluverður munur geti verið milli félaga innan sama sveitarfélags. Í Reykjavík kostar handboltinn fyrir 10 til 11 ára 105 þúsund krónur hjá Fylki en 161.650 krónur hjá Fram. Munurinn þar er 56.650 krónur á ári.
Hjá 14 til 15 ára er Víkingur með lægstu æfingagjöld af Reykjavíkurfélögunum, 149 þúsund krónur. Gjöldin eru hæst hjá Fram, 185.500 krónur og munar rúmlega 36 þúsund krónum. Fyrir yngsta aldurshópinn, 6 til 7 ára er bilið frá 83 þúsund krónum hjá Fylki upp í 112.500 krónur hjá Fram.
Æfingagjald hæst rúmlega 180 þúsund krónur
Verðmunur er einnig töluverður í körfuboltanum. Þar birta sum félög aðeins haustgjöld, eins og í handboltanum. Til að auðvelda samanburð ASÍ voru haustgjöld einnig tvöfölduð og sýnd sem áætlaður heildarkostnaður.
Lægsta árgjaldið í körfuboltanum hjá 6 til 7 ára börnum var hjá UMF Heklu, 53 þúsund krónur. Hæsta birta árgjaldið var 110.969 krónur hjá Stjörnunni.
Hjá 10 til 11 ára börnum var áætlaður heildarkostnaður hjá Heklu 51 þúsund og meðal félaga sem birtu árgjald var Selfoss með 106 þúsund krónur og Haukar með 130 þúsund krónur. Hjá Hetti var gjaldið 150 þúsund krónur.
Hjá börnum á aldrinum 14 til 15 ára var Hamar með lægsta birta árgjaldið, 97 þúsund krónur, og Stjarnan það hæsta, 182.187 krónur.
Í samantektinni kemur fram að greining á knattspyrnuiðkun og fimleikum sé væntanleg.
