Þær tillögur sem erindrekar Bandaríkjastjórnar lögðu fyrir úkraínska ráðamenn í dag gætu raunverulega orðið til að ljúka innrásarstríðinu að sögn talsmanns úkraínsku forsetaskrifstofunnar.
Volodymyr Zelensky forseti sagði í færslu á X í dag að stríðið gæti teygt sig hið minnsta inn í veturinn þótt öllum árum væri róið í átt að varanlegum og sanngjörnum friði í Úkraínu.
Hvorki hann né sendimennirnir Steve Witkoff og Jared Kushner tilkynntu um meiriháttar skref í átt að friði að loknum fundum dagsins en allir lýstu bjartsýni um framhaldið. Embættismaðurinn tók þó af tvímæli um að í tillögunum fælust áhrifaríkar lausnir.
Witkoff og Kushner báru tillögurnar undir Vladimír Pútín Rússlandsforseta í gær og þaðan mátti heyra sama bjartsýnistóninn. Witkoff sagði bæði ríki þurfa að gefa eftir eigi friður að nást. Zelensky ítrekaði í dag að eingöngu leiðtogafundur hans og Pútín gæti leyst deilur um landsvæði.
Zelensky þakkaði þeim Kushner og Witkoff fyrir heimsóknina, sagðist vonast til að koma á friði með liðsinni bandarískra vina sinna og kvaðst treysta á fulltingi samherja Úkraínu í Evrópu.
Hann boðaði fundahöld með leiðtogum Frakklands, Þýskalands og Bandaríkjanna án þess að tíunda það frekar. Erindrekarnir eru farnir frá Kyiv með lest og járnbrautafélag Úkraínu birti á Telegram mynd af þeim standandi á brautarpalli við skilti með áletruninni „Friðarhraðlestin“.
