Þingsályktunartillaga um framhald viðræðna um aðild Íslands að Evrópusambandinu var samþykkt með 34 atkvæðum gegn 8. 14 sátu hjá.
Þingmenn Sjálfstæðisflokksins og Framsóknarflokksins sátu hjá, og þingmenn Miðflokksins greiddu atkvæði á móti.
Atkvæðagreiðsla um þingsályktunartillöguna um framhald viðræðna um aðild Íslands að Evrópusambandinu, með samþykktri breytingartillögu, er hafin. Farið var fram á nafnakall og gera má ráð fyrir að flestir þingmenn stígi í pontu og geri grein fyrir atkvæði sínu.
Breytingartillögu meirihlutans um orðalag var samþykkt með 35 atkvæðum, 22 sátu hjá.
Spurningin verður því svohljóðandi:
„Á Ísland að hefja á ný aðildarviðræður við Evrópusambandið?“
Nú greiðir þingið atkvæði um nefndarálit frá meirihluta utanríkismálanefndar með breytingartillögu um orðalag spurningarinnar.
Breytingartillaga minnihlutans um að bæta við málsgrein um að birta samningsmarkmið 30 dögum fyrir þjóðaratkvæðagreiðsluna var felld með 35 atkvæðum gegn 22 .
Farið var fram á nafnakall, í stað þess að þingmenn greiði atkvæði með því að ýta á takka, í atkvæðagreiðslu um breytingartillögu minnihlutans um að bæta við málsgrein sem kveður á um að ráðherra skuli eigi síðar en 30 dögum áður en þjóðaratkvæðagreiðslan fer fram kynna opinberlega á vef Stjórnarráðsins samningsmarkmið Íslands í mögulegum aðildarviðræðum við Evrópusambandið hins vegar.
Breytingartillögu minnihlutans um orðalag í spurningu í þjóðaratkvæðagreiðslu var hafnað með 35 atkvæðum gegn 22.
Minnihlutinn á Alþingi vill orða spurningu í þjóðaratkvæðagreiðslu svona:
„Á Ísland að ganga til aðildarviðræðna við Evrópusambandið?“
Meirihlutinn á Alþingi vill orða spurninguna svona:
„Á Ísland að hefja á ný aðildarviðræður við Evrópusambandið?“
Nú hefst atkvæðagreiðsla um breytingartillögur minnihlutans um orðalag spurningarinnar annars vegar, og um að bæta við málsgrein sem kveður á um að ráðherra skuli eigi síðar en 30 dögum áður en þjóðaratkvæðagreiðslan fer fram kynna opinberlega á vef Stjórnarráðsins samningsmarkmið Íslands í mögulegum aðildarviðræðum við Evrópusambandið hins vegar.
Atkvæðin verða greidd í sitthvoru lagi og þingmenn fá að gera grein fyrir atkvæði sínu.
Breytingartillögu minnihlutans um að fresta þjóðaratkvæðagreiðslu til 17. október var hafnað með 35 atkvæðum gegn 18. 4 greiddu ekki atkvæði.
Atkvæðagreiðsla um breytingatillögu minnihlutans um að fresta þjóðaratkvæðagreiðslu til 17. október er hafin.
Þingmenn fá tækifæri til að gera grein fyrir atkvæði sínu um breytingatillöguna.
Nokkrir þingmenn óskuðu þess að taka til máls öðru sinni um atkvæðagreiðsluna, áður en greidd verða atkvæðu um breytingatillögur og svo þingsályktunartillöguna í heild. Það eru:
- Guðlaugur Þór Þórðarson (D)
- Dagbjört Hákonardóttir (S)
- Sigríður Á. Andersen (M)
- Diljá Mist Einarsdóttir (D)
- Sigurður Ingi Jóhannsson (B)
- Jón Pétur Zimsen (D)
- Sigmundur Davíð Gunnlaugsson (M)
- Þorgrímur Sigmundsson (M)
- Guðrún Hafsteinsdóttir (D)
Jón Pétur Zimsen, þingmaður Sjálfsæðisflokksins, sagði í sinni annarri ræðu um atkvæðageiðsluna, að Viðreisn ætti tilvist sína undir niðurstöðunni í þjóðatkvæðagreiðslunni.
Flokkurinn hefði verið stofnaður með það að markmiði að koma Íslandi í ESB og hafi knúið hina ríkisstjórnarflokkanna í þetta verkefni.
Hann spurði hvert yrði erindi Viðreisnar ef niðurstaða þjóðaratkvæðagreiðslunnar í ágúst yrði nei.
Dagur B. Eggertsson sagðist ætla að segja já við tillögunni og hvatti þá sem eru efins um aðild Íslands að Evrópusambandinu til að hugsa til laglínunnar „Segðu ekki nei, segðu kannski, kannski, kannski“.
„Látum á þetta reyna, höldum dyrunum opnum,“ sagði Dagur.
Þingmenn fá nú tækifæri til að taka til máls um atkvæðagreiðsluna og hefur umræðan staðið í rúman hálftíma og 12 eru enn á mælendaskrá þegar þetta er ritað.
Þegar þeir þingmenn sem þess óskuðu hafa tekið til máls um atkvæðagreiðsluna, greiða þingmenn atkvæði um breytingartillögur sem gerða hafa verið við þingsályktunartillöguna.
Meirihlutinn gerir eina breytingatillögu um orðalag spurningarinnar í þjóðaratkvæðagreiðslu og minnihlutinn allavega eina um dagsetningu, og hugsanlega aðra um samningsmarkmið. Þingmenn fá tækifæri til að gera grein fyrir atkvæði sínu um hverja breytingatillögu.
Að því loknu verður atkvæðagreiðla um lokatillöguna, með eða án breytingatillaga eftir því hvort þær verða samþykktar. Þá fá þingmenn aftur tækifæri til að gera grein fyrir atkvæði sínu. Það má því gera ráð fyrir að atkvæðagreiðslan taki tvær til þrjár klukkustundir í heild. Hún hófst klukkan 15.
Á milli ræðumanna sagði Þórunn Sveinbjarnardóttir, forseti Alþingis, að hana dreymdi um nýtt atkvæðagreiðslukerfi.
Fjöldi þingmanna stígur nú í pontu til að tjá sig um atkvæðagreiðsluna. Talsverðar líkur eru á að þeir eigi flestir eftir að stíga aftur í pontu til að gera grein fyrir atkvæði sínu. Þetta ferli á því eftir að taka talsverðan tíma.
Eins og við er að búast hafa þingmenn stjórnarandstöðu stigið í pontu og lýst því að þeir og flokkar þeirra ætli að kjósa gegn þingsályktunartillögunni. Eins hafa þingmenn ríkisstjórnarflokkanna stigið í pontu og útskýrt af hverju þeir ætla að segja já.
Guðmundur Ingi Kristinsson, sem er utan flokka á þingi eftir að hann sagði sig úr Flokki fólksins vegna trúnaðarbrests, steig í pontu og þakkaði stjórnarandstöðunni fyrir umræðurnar, og sérstaklega Miðflokknum.
Hann sagðist þess enn sannfærðari að segja já í dag og segja já í þjóðaratkvæðagreiðslu 29. ágúst, til að sjá hvort dómsdagsspá Miðflokksmanna myndi rætast.
Þórunn Sveinbjarnardóttir, forseti Alþingis, bað þingmenn að rétta upp hönd sem vildu taka til máls um atkvæðagreiðsluna og það gerði talsverður fjöldi.
Atkvæðagreiðsla um þingsáultunartillögu um framhald viðræðna um aðild Íslands að Evrópusambandsins er við það að hefjast.
Gera má ráð fyrir því að flestir þingmenn stígi í pontu og geri grein fyrir atkvæði sínu, og mun atkvæðagreiðslan því taka töluverðan tíma.
Sigmundur Davíð Gunnlaugsson, formaður Miðflokksins, var síðastur á mælendaskrá og umræðu er formlega lokið. Þingfundi hefur verið frestað til klukkan 15.
Magnús Geir Eyjólfsson þingfréttaritari fór yfir helstu kosti og galla aðildar að Evrópusambandinu í fréttinni hér að neðan.
Því skal haldið til haga að þjóðaratkvæðagreiðslan sem þingið hyggst kjósa um í dag snýst um aðildarviðræður við Evrópusambandið. Atkvæðagreiðslan, sem stefnt er að 29. ágúst, snýst ekki um ganga í Evróusambandið.
Ef aðildarviðræður verða samþykktar í þjóðaratkvæðagreiðslunni mun þjóðin fá að kjósa aftur um aðild að Evrópusambandinu, á grundvelli þess samnings sem þá verður tilbúinn.
Atkvæðagreiðslu þingsins um þingsályktunartillögu utanríkisráðherra verður í beinni á RÚV klukkan 15, en hægt er að fylgjast með yfirstandandi umræðum um tillöguna á RÚV 2 og í spilaranum hér efst í fréttavaktinni.
Aukaþingfundur hófst á Alþingi klukkan 10:30. Þar fer fram framhald seinni umræðu um þjóðaratkvæðagreiðslu um framhald viðræðna um aðild Íslands að Evrópusambandinu, en þingfundi gærdagsins var slitið klukkan skömmu fyrir klukkan eitt í nótt.
Ljúka þarf seinni umræðunni og samþykkja þarf þingsályktunartillögu utanríkisráðherra í síðasta lagi í dag til að unnt verði að halda þjóðaratkvæðagreiðsluna 29. ágúst.
