Stytting hringvegarins um Húnavallaleið við Blönduós og Vindheimaleið í Skagafirði hefur verið rædd í rúman áratug. Í samgönguáætlun til ársins 2040, sem verður líklega samþykkt á Alþingi á næstu dögum, er hvergi minnst á þessar leiðir sem myndu stytta veginn um allt að 20 kílómetra.
„Mér hefði fundist eðlilegt, ef við horfum til lengri framtíðar, að Húnavallaleið og Vindheimaleið væru inni í samgönguáætlun. Það er hægt að stytta akstursleiðina milli Eyjafjarðar og Reykjavíkur um 45 mínútur,“ segir Njáll Trausti Friðbertsson, þingmaður Sjálfstæðisflokksins í Norðausturkjördæmi, og vísar til framkvæmda við Borgarnes og Sundabrautar. Mikill meirihluti þeirra sem svöruðu nýlegri könnun Samgöngufélagsins er hlynntur Húnavallaleið.
Annar þingmaður Sjálfstæðisflokksins er á móti
Ólafur Adolfsson, flokksbróðir Njáls Trausta og þingmaður í Norðvesturkjördæmi, sem situr í umhverfis- og samgöngunefnd Alþingis segir að þessar styttingar séu ekki á dagskrá og mikil andstaða við þær í kjördæminu.
Verði þessar styttingar að veruleika sneiðir hringvegurinn fram hjá Blönduósi og Varmahlíð.
„Málið er í rauninni ekkert á dagskrá, svo ég segi það bara. Það hefur verið andstaða við þessar áætlanir, það ég best veit, í Húnabyggð og nærsveitum. Það getur leitt af sér lakari þjónustu í kringum Húnabyggð og það er auðvitað ekki eitthvað sem þessi sveitarfélög eru að kalla eftir,“ segir Ólafur.
Það vekur athygli að þingmenn í sama flokki, hvor í sínu norðurkjördæminu, eru svona hróplega ósammála. Ólafur telur það eiga sér eðlilegar skýringar.
Þarna mætast stálin stinn.
„Samtöl okkar Njáls eru bara heiðarleg. Hann ber hagsmuni norðausturhornsins fyrir brjósti og ég er að hugsa um sveitarfélögin sem þarna eru og það er augljós ágreiningur um þetta. Njáll er fylginn sér og ég veit að hann hefur verið ötull talsmaður í þessu máli. Þarna mætast stálin stinn.“
