Leiðtogi stjórnarandstöðunnar í Venesúela og handhafi friðarverðlauna Nóbels, María Corina Machado, er komin til heimalandsins eftir tæpt ár í útlegð. Stuðningsfólk hennar tók á móti henni við kirkju í borginni Barquisimeto. „Ég er hér. Með ykkur,“ sagði Machado í færslu sem hún birti á samfélagsmiðlinum X.
Machado fékk ekki að bjóða sig fram gegn Nicolás Maduro í forsetakosningunum árið 2024, þrátt fyrir að hafa sigraði í óháðu forvali forsetaframbjóðenda árið áður. Það forval var haldið utan við opinbera kjörstjórn ríkisstjórnar Maduros og í því hlaut hún 90% atkvæða. Maduro sakaði hana um svik og brot á skattalögum en hún neitaði ásökununum og sagði þær pólitískar.
Edmundo Gonzalez Urrutia, náinn bandamaður Machado, bauð sig síðan fram gegn Maduro í forsetakosningunum árið 2024. Maduro var lýstur sigurvegari kosninganna en niðurstöður þeirra voru aldrei birtar. Niðurstöður stjórnarandstöðunnar sýndu þó að Gonzalez Urrutia hefði unnið öruggan sigur. Hann flúði síðar land og er enn í útlegð en er mikill stuðningsmaður Machado.
Machado taldi sig ekki örugga í Venesúela
Machado var lengi í felum í Venesúela til að forðast handtökur af völdum ríkisstjórnar Nicolás Maduro eftir framboðið. Í desember 2025 var henni smyglað út úr landinu svo hún gæti tekið á móti friðarverðlaunum Nóbels í Osló í Noregi. Í byrjun janúar handsamaði bandaríski herinn Nicholás Maduro og eiginkonu hans Ciliu Flores.
Machado hefur margsinnis hampað Donald Trump Bandaríkjaforseta fyrir að hafa handtekið Maduro og gaf honum friðarverðlaun sín í þakklætisskyni.
Bandaríkjastjórn gerði heimkomuna mögulega
Svo virðist sem Bandaríkjaforseti hafi þó ekki verið með á nótunum um heimkomu Machado. Í viðtali við fréttamenn í gær sagðist hann ekkert vita um það en hún væri almennileg kona og hann vonaði að hún væri örugg. Hann bætti svo við að Bandaríkin væru að gera góða hluti í Venesúela.
Trump hefur margsinnis dásamað Delcy Rodrigues, sitjandi forseta Venesúela og fyrrum varaforseta Maduros. Hún hefur samþykkt kröfur Bandaríkjanna, sérstaklega aukið aðgengi að olíu.
Marco Rubio utanríkisráðherra Bandaríkjanna er þó velkunnugt um málið. Hann sagði í gær að heimkoma Machado hefði verið gerð möguleg með aðkomu bandarískra stjórnvalda. Hann sagði landið nú standa frammi fyrir því í fyrsta sinn í 30 ár að geta náð fram lýðræðislegum og sanngjörnum kosningum með friðsamlegum hætti og varanlegu lýðræði.
Þúsundir mótmæltu í Caracas og fleiri borgum í síðustu viku og kröfðust kosninga í landinu. Flokkur Machado, Vente Venezuela, hefur sömuleiðis talað fyrir kosningum og vill þingkosningar á næsta ári. Margir leiðtogar úr flokknum hafa nýverið snúið aftur heim á leið eftir að hafa farið í útlegð.
