Halla Tómasdóttir forseti Íslands segir nokkur þemu standa upp úr öllum samtölum á ráðstefnu um Gervigreind til góðs í Genf og á fyrsta fundi nýrrar alþjóðlegrar ráðgjafanefndar sem ber heitið AI for Good Global Commission.
Í fyrsta lagi leggi allir áherslu á að gervigreindin verði nýtt til að leysa raunveruleg samfélagsleg vandamál en ekki búa til ný.
„Það er lausnamiðuð hugsun,“ segir Halla í samtali við mbl.is. „Einkageirinn er mjög mikið að ræða um að það þurfi að rækta frumkvöðlaandann en til að þú getir verið í lausnaham þarftu að huga að því hvernig þú eykur færni fólks og tryggja að það sé ekki bara gert í San Fransiskó eða tækniborgunum heldur sé sú færni í boði fyrir litlar þjóðir, samfélög á suðurhveli, fátækt fólk, ungt fólk, eldra fólk.“
Endurhugsa menntamál
Annað sem margir hafi rætt á fundunum er að það þurfi að endurhugsa menntamálin.
„Við erum líklega í dag að mennta ungt fólk í háskólum um allan heim sem mun tæpast eiga starf á því sviði sem við erum að mennta það á. Þannig að það þarf að hugsa menntamál alveg upp á nýtt í ljósi þess sem er að gerast og líka huga að endurmenntun og uppfærslu á færni og hæfni á vinnumarkaði almennt. Ég trúi því að það verði störf sem leggist af og önnur sem komi í staðinn, en það þarf nýja færni til að mæta nýjum tímum,“ segir hún.
Sameiginleg viðmið
Þriðja þemað sem henni finnst hafa verið áberandi er hvernig við setjum sameiginleg viðmið og vegrið á sviði gervigreindar og tryggjum öryggi og skynsemi í því hvernig við stýrum þessari tæknilegu umbyltingu í þágu mannkynsins.
„Ég held að það hafi kannski komið mér mest á óvart að þarna var nokkuð góður samhljómur, hvort sem til máls tóku einstaklingar úr einkageiranum, stjórnmálamenn, ráðherrar, baráttufólk fyrir mannréttindum eða fólk frá norður- og suðurhveli jarðar. Það voru allir nokkuð sammála um að það þurfi að gefa öllum jafnan aðgang að tækni og færni til þess að gervigreindin nýtist til góðs fyrir heiminn. Ef hún eykur ójöfnuð enn frekar þá skapast ný heimsmynd sem gengur ekki upp fyrir neinn.“
Hversu mikla orku við nýtum
Hún segir að fjórða þemað sem hún tók eftir á fundinum sé almennar áhyggjur af því hversu mikil orka er notuð í þessa umbyltingu.
„Talandi um hættu á auknum ójöfnuði, þá þarf mikla orku og reiknigetu í þessa umbyltingu. Eins og staðan er í dag er 75% af reiknigetunni sem þarf til að nota gervigreind til að leysa samfélagsleg vandamál í Bandaríkjunum, 15% í Kína og 5% í Evrópu. Þannig að það er nú lítið eftir fyrir litlar þjóðir og aðra þegar maður hugsar þetta alla leið. Þetta samtal er að gera það að verkum að fólk er að átta sig á hvað ójöfnuðurinn er mikill og fer vaxandi. Stóru skilaboðin mín hafa verið að traust sé innviður og að við þurfum að byggja þannig ramma um þetta að við getum treyst gervigreindinni og að við getum áfram treyst hvert öðru. Það er traust til stjórnvalda, einkageirans og þeirra grunngilda sem þurfa að liggja að baki þessari breytingu svo hún þjóni mannkyni en ekki öfugt.“
Ungt fólk missi ekki trúna
Hún segir að fimmta atriðið sem margir hafi rætt um sé að miklu skipti að ungt fólk missi ekki trúna á framtíðinni.
„Við verðum að tryggja að ungt fólk fái raunverulegt sæti við borðið í að móta framtíðina með okkur. Við getum ekki tekið ákvarðanir í dag án þess að ungt fólk taki virkan þátt, því við erum nú að móta möguleikana og ómöguleikana fyrir margar kynslóðir sem koma á eftir okkur,“ segir Halla að lokum.
