Úkraína hefur hvatt Evrópusambandið til þess að hjálpa til í viðræðum ríkisins við Rússland um lok innrásarstríðsins. Evrópusambandið hefur haft þetta til skoðunar þar sem tilraunir Bandaríkjanna til að miðla málum hafa stöðvast og aukinn þungi færst í árásir Rússa á Úkraínu að undanförnu. Á meðal þeirra sem nefndir hafa verið sem sérstakir samningamenn eru Angela Merkel, fyrrverandi kanslari Þýskalands, og Mario Draghi, fyrrverandi forsætisráðherra Ítalíu.
Á óformlegum fundi utanríkisráðherra ESB á Kýpur í morgun lagði Kaja Kallas, utanríkismálastjóri ESB, áherslu á að nálgast ætti viðræður við Rússland sem sameiginlegt verkefni.
Rússar vilji fá afléttingu á refsiaðgerðum ESB gegn ríkinu. ESB eitt geti ákveðið hvort þeim verði aflétt eða ekki. „Til að hægt sé að taka slíka ákvörðun þurfum við líka að gera skýrt að við höfum mjög, mjög mikilla hagsmuna að gæta. Að sjálfsögðu eru öll þau málefni sem varða Úkraínu eitthvað sem aðeins Úkraína og Rússland geta samið um og komist að niðurstöðu um. En það eru mörg atriði sem varða Evrópu.“
Umræða um fulltrúa sé að hennar mati gildra sem Rússar vilji að sambandið gangi í, að rætt sé hver tali við þá á meðan þeir séu farnir að velja hverjir séu hæfir til viðræðna og hverjir ekki.
„Við skulum ekki falla í þá gildru. Samningaviðræður eru alltaf samstillt átak. [...] Þess vegna skiptir innihaldið miklu meira máli en hver það er sem talar,“ segir Kallas.
