Mæðgurnar eru hin 48 ára gamla Jennifer Balcarras og dóttir hennar Selah Reed, 20 ára, en lík þeirra fundust skammt frá gönguleið og samkvæmt náttúruverndareftirliti Bresku Kólumbíu voru ummerki á vettvangi „bentu til þess að dýr kynni að hafa átt hlut að máli“, er fram kemur í grein breska ríkisútvarpsins (BBC) um málið.
Náttúruverndarfulltrúar vinni nú að því að hafa uppi á þeim björnum sem kunna að hafa átt hlut að máli. Haft er eftir Jeff Tyre, eftirlitsmanni hjá eftirlitinu, að enn væri óljóst hvort fleiri en einn björn hefðu hugsanlega átt þátt í dauða kvennanna.
Balcarras hafði nýlega flutt til Bella Coola til að hefja nýjan starfsferil og nýjan kafla í lífi sínu, samkvæmt söfnun á netinu sem ætlað er að hjálpa fjölskyldunni með útfararkostnað.
Talið er að á bilinu tíu til þrettán þúsund grábirnir lifi í fylkinu en grábirnir geta verið árásargjarnir á þessum árstíma þegar þeir safna fituforða. Mál sem þetta eru þó tiltölulega sjaldgæf nema dýrinu bregði eða það sé að verja húna sína og fæðu, er fram kemur í frétt BBC.
Þó hafa nokkrar árásir átt sér stað í Bresku Kólumbíu á undanförnum árum.
Yfirvöld hafa gefið út að útgöngubann gildi á svæðinu, sem er um þúsund kílómetra norður af Vancouver, á meðan leitin að dýrinu eða dýrunum sem stóðu að árásinni heldur áfram. Ef „björninn sem um ræðir“ næst verður hann aflífaður til að tryggja öryggi almennings, er haft eftir Tyre í umfjöllun CNN um málið.
