Um er að ræða hinn 55 ára gamla Hubert Aiwanger, sem var varaforsætisráðherra sambandslandsins Bæjaralands í Suður-Þýskalandi, er fram kemur í umfjöllun fréttaveitunnar Reuters um málið. Þar er vitnað í yfirlýsingu lögreglunnar í höfuðborginni sem segir að Aiwanger hafi „fundist látinn á hótelherbergi sínu“ í Mitte-hverfinu í Berlín.
Lögreglan og saksóknaraembættið hafi nú hafið rannsókn til að „ganga úr skugga um nákvæma dánarorsök og þær aðstæður sem lágu að baki andlátinu“, er fram kemur í yfirlýsingunni. Einnig sé leitast við að „útiloka hugsanlega aðkomu þriðja aðila“.
Aiwanger var leiðtogi popúlíska flokksins Freie Wähler, sem mætti þýða sem Frjálsir kjósendur, og efnahagsráðherra Bæjaralands. Hann var staddur í Berlín til að vera viðstaddur opnun skrifstofu flokksins.
Hann hafði aflýst viðburðinum vegna vanlíðunar, er fram kemur í umfjöllun þýska dagblaðsins Bild um andlátið en samkvæmt því var Aiwanger ekki kvæntur en hann bjó með sambýliskonu sinni, Tönju Schweiger, sem einnig er stjórnmálamaður og stýrir héraðsstjórninni í Regensburg. Parið á tvo syni og hefur verið rætt við alla aðstandendur hins látna, eftir því sem fram kemur í umfjöllun Reuters.
