Katrín Sigurjónsdóttir, sveitarstjóri í Þingeyjarsveit, vann við skreiðarsölu frá Íslandi á árunum 1994-2018. Á þesssu tímabili starfaði hún meðal annars við sölu á skreið fyrir Samherja og síðar hjá eigin fyrirtæki sem heitir Samleið. Þetta fyrirtæki selur búnað sem notaður er við skreiðarverkun, meðal annars til skreiðarþurrkunar Samherja á Laugum í Þingeyjarsveit. Þegar Katrín var sveitarstjóri á Dalvík sat hún í stjórn Fiskidagsins mikla sem Samherji hefur fjármagnað að hluta til í gegnum árin.
Þetta er meðal þess sem kemur fram í bréfinu frá Katrínu til sveitarfélagsins Þingeyjarsveitar þar sem hún ræðir um tengsl sín við Samherja í gegnum árin og aðkomu sína að skreiðarviðskiptum á Íslandi.
Fréttastofa greindi frá málinu í gær og sagði Katrín meðal annars frá því að hún hefði ekki íhugað að segja frá aðkomu að málum tengdum skreiðarþurrkun Samherja á Laugum vegna þess að hún hefði ekki fundið til vanhæfis. Vegna stærðar og mikilvægis skreiðarþurrkunar Samherja í sveitarfélaginu koma mál sem tengjast henni ítrekað inn á borð sveitarstjórnarinnar. „Ef ég hefði fundið til vanhæfis hefði ég alltaf vakið athygli á því,“ sagði hún.
Víkur mögulega af fundum
Knútur Emil Jónasson, oddviti sveitarstjórnar í Þingeyjarsveit, sagði við fréttastofu í gær að Katrín hefði greint frá eignarhaldi sínu á fyrirtækinu Samleið þegar hún var ráðin til sveitarfélagsins í sumar. Hann sagði að það gæti komið til þess að Katrín viki af fundum þar sem rætt er um skreiðarþurrkunina á Laugum sem er stærsti einkarekni vinnustaður sveitarfélagsins.
Hann sagði: „En vissulega þurfum við að hafa í huga við afgreiðslu á málum, þegar svona tengingar eru, á hvaða tímapunkti þarf að taka til skoðunar að hún víki frá. En hennar áhrif gagnvart ákvarðanatöku sveitarstjórnar eru ekki til að hafa áhyggjur af að við teljum.“
Talsverð umræða hefur verið um skreiðarþurrkunina á Laugum eftir að Úrskurðarnefnd umhverfis- og auðlindamála felldi starfsleyfi hennar úr gildi í síðasta mánuði vegna umhverfismála. Samherji vinnur nú að því að fá tímabundið starfsleyfi meðan unnið er að úrbótum á mengunarvörnum.
Nokkur sambærileg mál hafa komið upp
Ein af spurningunum sem þetta mál varpar ljósi á er laga- og reglusetning um hagsmunaskráningu kjörinna fulltrúa og ráðinna starfsmanna í sveitarstjórnum. Hingað til hafa engar samræmdar reglur verið um slíka hagsmunaskráningu í lögum.
Fyrir Alþingi liggur lagafrumvarp um ný sveitastjórnarlög þar sem meðal annars fjallað um þetta atriði og mælt fyrir samræmdum reglum um það til að koma í veg fyrir mögulega hagsmunaárekstra.
Nokkur mál hafa komið upp á liðnum árum þar sem hagsmunaskráning kjörinna fulltrúa og ráðinna starfsmanna sveitarfélaga hefur ekki legið fyrir og hefur þetta leitt til umfjöllunar í fjölmiðlum.
Bréfið í heild sinni
Bréfið sem Katrín skrifaði til sveitarfélagsins Þingeyjarsveitar er birt í heild hér fyrir neðan í til að varpa ljósi á samhengi málsins.
„Til þess er málið varðar
Ég, Katrín Sigurjónsdóttir, [...] , sveitarstjóri í Þingeyjarsveit hef frá árinu 2014 átt 50% hlut í fyrirtækinu Samleið ehf. Eiginmaður minn, Haukur Snorrason, á 50% hlut. Aðalstarfsemi Samleiðar er innflutningur til Íslands á vörum frá Kína og Bangladesh.
Meðal vöruflokka sem fyrirtækið selur eru skreiðarþopkar og grindur fyrir margar fiskþurrkanir á landinu og víðar um heiminn. Meðal kaupenda vörunnar er Samherji fyrir sínar fiskverkanir, m.a. á Laugum. Samherji kaupir þessar vörur ekki eingöngu af Samleið enda Samleið á samkeppnismarkaði þar sem fleiri fyrirtæki selja sömu vöru eða sambærilega vöruflokka.
Eiginmaður minn starfar fyrir Samleið og heldur utan um rekstur fyrirtækisins. Ég hef aldrei starfað fyrir Samleið. Vegna anna minna í öðrum störfum hef ég í gegnum árin haft mjög takmarkaða aðkomu að rekstri Samleiðar og eingöngu haft aðkomu í gegnum eignahald.
Ég starfaði við sölu á skreiðarafurðum frá ýmsum löndum til Nígeríu á árunum 1994-2018. Þar á meðal fyrir Samherja allt fram til ca. 2006. Frá þeim tíma og fram til 2018 voru samskiptin við Samherja aðallega sem sölukollegar á sama markaði.
Ég átti lengi sameiginlega stjórnarsætu með Samherja í stjórn Fiskidagsins Mikla á Dalvík. Allt fram til ársins 2022 þegar ég flutti til Húsavíkur.
Í gegnum samskipti mín við Samherja þekki ég vel til fyrri eigenda fyrirtækisins, ég þekki ekki persónulega neinn í núverandi eigendahópi, þ.e. næstu kynslóð eigenda. Ég þekki mjög vel marga af lykilstarfsmönnum Samherja enda margir þeirra búsettir eða hafa verið starfandi á Dalvík um árabil, þar sem ég bjó í 34 ár. Meðal þeirra eru nokkrir yfirmenn sem vinna að þurrkun Samherja á Laugum. Ég þekki ekki persónulega neina úr núverandi starfsmannahópi þurrkananna á Laugum en ég þekki til eldri starfsmanna sem eru hættir.
Ég var sveitarstjóri í Dalvíkurbyggð 2018-2022 þar sem Samherji er stórt fyrirtæki í atvinnulífinu. Ég átti sem sveitarstjóri þónokkur samskipti við fyrirtækið m.a. í kringum ákvörðun Samherja um að byggja þar upp nýja hátæknifiskverkun.
Laugum 30. september 2026
Katrín Sigurjónsdóttir“
*** Leiðrétting: Í fyrri útgáfu fréttarinnar kom fram að Katrín Sigurjónsdóttir hefði unnið hjá Samherja á einhverjum tímapunkti fram til ársins 2006. Hið rétt er að hún vann við skreiðarsölu fyrir ýmsa aðila, meðal annars Samherja.
