Flestir jökulsporðar íslenskra jökla hörfuðu á jökulárinu 2024–2025 samkvæmt mælingum sjálfboðaliða Jöklarannsóknafélagsins. Breytingin er einna mest á stærri skriðjöklum Vatnajökuls, Langjökuls og Mýrdalsjökuls.
Þetta kemur fram í fréttabréfi á vegum verkefnisins „Hörfandi jöklar: Lifandi kennslustofa í loftslagsbreytingum“. Verkefnið er unnið í samvinnu umhverfis- og auðlindaráðuneytisins, Vatnajökulsþjóðgarðs, Veðurstofu Íslands, Jarðvísindastofnunar Háskóla Íslands og Náttúrustofu Suðausturlands.
Í fréttabréfinu segir að mikið hop hafi mælst á Leirufjarðarjökli og Lambatungnajökli og örlítill framgangur í Gígjökli. Heinabergsjökull brotnaði mikið upp sumarið 2025 og hefur sporðurinn styst um 3 kílómetra á síðastliðnum 2 árum.
Gögnin benda til þess að tímabili hægari rýrnunar árin 2012–2020 sé lokið og jöklarnir tapi nú aftur massa jafn ört og á tímabilinu 1995–2011.
Jökulárið 2024–2025 var afkoma mæld á um 130 stöðum á jöklum landsins. Lítil vetrarafkoma og mikil sumarleysing ollu því að ársafkoman var mun neikvæðari en á meðalári. Tapið skýrist af óvenjulegum hlýindum að hausti og vetri, sem ollu því að úrkoma féll sem regn frekar en snjór, og af einu hlýjasta sumri frá upphafi mælinga.
