Sprengingar heyrðust í Kænugarði, höfuðborg Úkraínu, skömmu eftir að úkraínski flugherinn varaði við því að eldflaugar væru á leið í átt að borginni. Loftvarnakerfi voru virkjuð til að reyna að verjast árásinni sem er ein af mörgum sem Rússar hafa gert á höfuðborgina á undanförnum vikum.
Vitali Klitschko, borgarstjóri Kænugarðs, greindi frá því á samfélagsmiðlinum Telegram að rússneski herinn hefði ráðist á borgina með eldflaugum og hvatti íbúa til að halda sig í loftvarnabyrgjum meðan hættan stæði yfir.
Eldar kviknuðu í Holosiivsky-hverfinu í suðurhluta Kænugarðs eftir sprenginguna. Ekki hefur verið greint frá mannfalli eða umfangi tjónsins. Loftvarnaflautur höfðu farið í gang skömmu áður en röð sprenginga heyrðist víðs vegar um borgina.
Fyrr í dag funduðu þjóðarleiðtogar í bandalagi hinna viljugu- þjóðabandalagi til stuðnings Úkraínu í stríðinu við Rússa, í París um aukinn stuðning við Úkraínu og leiðir til að beita þrýstingi til að koma á vopnahléi og nýjum viðræðum.
Fyrir fundinn tilkynntu tíu ríki um stofnun nýs samstarfs til að þróa eldflaugavarnakerfi í Evrópu. Í yfirlýsingunni kemur fram að það sé trú þessara þjóða að verndun Evrópu þurfi samstarf á heimsvísu um samhæft eldflaugavarnakerfi til að draga úr þeirri hættu sem stafi af eldflaugum.
Löndin sem eru í þessu bandalagi eru Bretland, Danmörk, Frakkland, Holland, Ítalía, Noregur, Spánn, Svíþjóð, Úkraína og Þýskaland.
Volodímír Selenskí Úkraínuforseti fagnaði ákvörðuninni og sagði hana marka tímamót í varnarsamstarfi Evrópuríkja. Hann hefur ítrekað hvatt vestræn ríki til að afhenda Úkraínu öflugri loftvarnakerfi þar sem Rússar hafa að undanförnu beint ofurhraðskreiðum skotflaugum í átt að úkraínsku höfuðborginni sem loftvarnarkerfi Úkraínumanna ráða illa við.
Rússneski herinn hefur ítrekað gert loftárásir á Kænugarð undanfarnar vikur. Ein mannskæðasta árásin átti sér stað aðfaranótt 2. júlí þegar loftárás Rússa varð að minnsta kosti 30 manns að bana.
