Leikarinn Ted Danson segist þurfa að biðjast afsökunar það sem eftir er ævinnar vegna umdeilds atriðis sem hann flutti á skemmtikvöldi árið 1993, þar sem hann kom fram í svokölluðu „blackface“ og notaði kynþáttaníðsyrði.
Danson ræddi málið í hlaðvarpsþættinum Who’s With Me? og sagði að hann bæri enn ábyrgð á því sem gerðist.
„Ég þarf að biðjast afsökunar og ég vil biðjast afsökunar það sem eftir er ævinnar,“ sagði hann.
Um var að ræða atriði á Friars Club-kvöldi til heiðurs þáverandi maka hans, Whoopi Goldberg. Danson sagðist á þeim tíma hafa litið á atriðið sem háðsádeilu um kynþætti og sambönd fólks af ólíkum kynþáttum, en viðurkennir nú að hann hafi verið „hrokafullur og heimskur“ að halda að hann gæti komið slíku efni til skila án þess að valda skaða.
Danson og Goldberg voru saman á árunum 1992 til 1993 en á þeim tíma var hann enn kvæntur eiginkonu sinni, Cassandra Coates.
Danson sagði að hann hefði nálgast verkefnið sem eins konar gjörningaleikhús og taldi að það yrði aðeins sýnt í lokuðu sjónvarpskerfi fyrir viðstadda gesti. Friars Club-kvöld af þessu tagi voru almennt einkaviðburðir á þeim tíma.
Viðbrögðin urðu þó hörð þegar efnið komst í hámæli. Sjónvarpsmaðurinn Montel Williams á að hafa gengið af sviðinu í mótmælaskyni og þáverandi borgarstjóri New York-borgar, David Dinkins, sagði atriðið hafa farið langt yfir mörkin. Friars Club baðst síðar afsökunar vegna málsins.
Danson rifjaði upp að hann hefði áttað sig á því nánast samstundis að atriðið væri að mistakast.
„Það var eins og ég hefði stungið fingrinum í rafmagnsinnstungu,“ sagði hann en þrátt fyrir gagnrýnina kom Goldberg honum til varnar opinberlega á sínum tíma.
