Tvö af stærstu fjölmiðlafyrirtækjum landsins, RÚV og Morgunblaðið, halda úti umræðuþáttum þar sem málefni líðandi stundar eru rædd í myndveri. RÚV er með Silfrið en Morgunblaðið heldur úti Spursmálum.
Eftir að Alþingi samþykkti í lok maí að efnt yrði til þjóðaratkvæðagreiðslu um ESB-umsókn þann 29. ágúst var flestum ljóst að pólitísk umræða sumarsins yrði mikil. Fá mál hreyfa jafn sterkt við þjóðinni og spurningin um hvort Ísland eigi að standa utan Evrópusambandsins eða endurlífga umsóknina frá árinu 2009.
ESB-slagsíða sérfræðinga í Silfrinu
RÚV hefur tilkynnt að Silfrið fari í sumarfrí samkvæmt venju og verði ekki á dagskrá fyrr en eftir verslunarmannahelgi. Þjóðmálaþáttur ríkisútvarpsins verður því utan dagskrár í tæpa tvo mánuði á sama tíma og eitt stærsta pólitíska ágreiningsmál landsins er til umræðu.
Síðasta Silfrið fyrir sumarleyfi var á þriðjudag í umsjón Sigríðar Hagalín Björnsdóttur. Umræðuefnið var ESB og fyrirhuguð þjóðaratkvæðagreiðsla.
Áður en þátturinn var sýndur birti RÚV frétt um hverjir yrðu gestir þáttarins. Sú tilkynning vakti talsverða athygli þar sem enginn viðmælenda var yfirlýstur andstæðingur ESB-aðildar en fjórir af fimm hafa lýst yfir stuðningi við aðild eða tengjast málstaðnum með einum eða öðrum hætti.
Heimssýn, samtök þeirra sem leggjast gegn ESB-aðild, sendi í kjölfarið formlega kvörtun til yfirstjórnar RÚV og sagði ekkert lát á slagsíðu ríkisfjölmiðilsins.
„Við verðum að biðja ykkur að taka á þessu máli svo eðlileg lýðræðisleg umræða fái þrifist í landinu,“ segir í kvörtun Heimssýnar.
Viðskiptablaðið spurði einnig hvernig það stæðist að ríkisfjölmiðillinn gætti ekki jafnvægis í stærsta pólitíska ágreiningsmáli þjóðarinnar og setti upp umræðu um Evrópusambandið þar sem andstæðingar aðildar virtust fá lítið sem ekkert vægi.
Blaðið benti jafnframt á að sú afsökun dygði skammt að um sérfræðinga væri að ræða.
„Sérfræðingar hafa líka afstöðu, sögu og tengsl og nálgun,“ sagði í umfjöllun Viðskiptablaðsins.
Stefán Einar hæðist að RÚV
Stefán Einar Stefánsson, þáttastjórnandi Spursmála á Morgunblaðinu, hefur á sama tíma tilkynnt að umræðuþátturinn, sem jafnan tekur sumarleyfi, verði á dagskrá í allt sumar fram að þjóðaratkvæðagreiðslunni um ESB-umsóknina 29. ágúst.
Stefán Einar gerði jafnframt grín að ákvörðun RÚV í færslu á Facebook.
„Það er auðvitað ákveðið afrek að líta á djúpstæða þjóðfélagsumræðu, fullveldisdeilu, auðlindamál og framtíð atvinnulífsins og hugsa: Þetta hljómar eins og eitthvað sem má taka eftir verslunarmannahelgi,“ skrifaði Stefán Einar.
