Grímur Atlason, framkvæmdastjóri Geðhjálpar, segir umhugsunarvert hversu ríkir fordómar séu gagnvart geðrænum erfiðleikum í samfélaginu. Samtökin telji sig ekki hafa aðra kosti en að selja húsnæði sem átti að nota sem skjólshús fyrir fólk sem glímir við andlega erfiðleika. Íbúar í nágrenninu gáfu skýr skilaboð um að vilja ekki slíka starfsemi í hverfið.
Þjónusta á jafningjagrundvelli
Rétt fyrir síðustu áramót gerði Geðhjálp samning við heilbrigðis- og félags- og húsnæðisráðuneytin um að opna skjólshús. Úrræðið er hugsað fyrir fólk í tilfinningalegri krísu vegna andlegra áskorana og markmiðið að bjóða upp á tímabundna dvöl og þjónustu á jafningjagrundvelli.
Á nýju ári hófst leit að hentugu húsnæði sem fannst í grónu íbúðahverfi á jaðarlóð í grennd við náttúru. Samkvæmt hugmyndafræðinni sem Geðhjálp vinnur eftir er leitast við að sameina fólk í stað aðgreiningar.
Ætlunin var að kynna úrræðið fyrir nágrönnum sex mánuðum fyrir opnun.
Stór orð féllu
Það gerðist þó ekki þar sem íbúar í nágrenni við húsnæðið fengu upplýsingar um fyrirhugaðar áætlanir og settu sig upp á móti þeim. Á fjölmennum fundi íbúa og Geðhjálpar sögðust íbúar ekki vilja starfsemina í hverfið.
Samkvæmt Grími féllu stór orð á fundinum. Íbúar töldu ógn geta stafað af gestum, óttuðust ónæði vegna vímuefnanotkunar, sprautunálar og skemmdir á eigum. Sumir töldu að öryggi barnanna í hverfinu væri í hættu og að fasteignaverð myndi lækka. Skjólshúsið gæti ekki verið í byggð og það hentaði mun betur að fara með úrræðið upp í sveit.
Ákveðið að setja húsnæðið aftur í sölu
Eftir þennan fund settust aðstandendur verkefnisins niður og tóku þá ákvörðun að óforsvaranlegt væri að bjóða gestum og starfsfólki upp á slíkt umhverfi. Því var ákveðið að setja húsnæðið aftur í sölu.
Í tilkynningu segir Grímur umhugsunarvert hversu ríkir fordómar séu gagnvart geðrænum erfiðleikum í samfélaginu. Fólkið sem mætti á fundinn var að hans mati þverskurður af samfélaginu. Hann segir andstöðu þeirra byggja á ótta, þekkingarleysi og fyrirfram mótuðum skoðunum sem gegnumsýri samfélagið.
Ekki í mínum bakgarði
Svava Arnardóttir, formaður Geðhjálpar, segir andstöðu íbúanna koma sér á óvart.
„Ég hélt að slíkir fordómar heyrðu sögunni til en vissulega rímar þetta við það sem stundum er talað um sem Not in my backyard eða NIMBY nálgun þar sem fólk er mögulega skilningsríkt gagnvart einstaklingum, þetta er allt saman gott og blessað, þetta úrræði er fínt en bara ekki í mínu nágrenni, ekki í mínu hverfi takk fyrir pent.“
