„Það var mikilvægt að koma saman svona skömmu eftir að þessir atburðir áttu sér stað, og fara yfir staðreyndir málsins og hvað við getum lært af þessu,“ segir Þorbjörg Sigríður Gunnlaugsdóttir dómsmálaráðherra, um fjarfund ráðherra Schengen ríkjanna sem haldinn var í morgun.
Til þessa fundar var boðað í kjölfar þess að tuttugu og fjórir af tuttugu og sjö leiðtogum Evrópusambandsríkjanna sendu framkvæmdasttjórn ESB opið bréf og kölluðu eftir umræðum og aðgerðum í kjölfar atburðanna í Cueta um síðustu helgi.
„Varðandi staðreyndir málsins þá var auðvitað sameiginlegur skilningur á því að á þessu svæði sem um ræðir gilda sérstaka reglur. Það var ekki þannig að tugir þúsunda manna væru komnir upp að meginlandi Spánar, heldur gerist þetta Afríkumegin, þar sem sérstakar reglur eru í gildi og koman þangað framkallar ekki sjálfkrafa för inn á Schengen svæðið,“ segir Þorbjörg.
Engar takmarkanir hér á landi
Athygli vakti að stjórnvöld á Ítalíu ákváðu í framhaldinu af atburðunum í Cueta að taka tímabundið úr gildi frjálsa för fólks milli Spánar og Ítalíu. Þorbjörg vildi ekki dæma um þá aðgerð, sagði að hún hefði mögulega verið snemmbær. Hún segir að engar ráðstafanir hafi verið gerðar hér á landi.
„Norðurlöndin áttu saman fund strax á föstudaginn til að ræða hvernig þessar aðstæður litu út gagnvart okkur,“ segir Þorbjörg. „Ég var þeirrar skoðunar að það ekki ástæða til þess, vegna þess - aftur - að þetta fólk steig ekki inn á meginland Spánar og við erum auðvitað eyja. Við tilheyrum auðvitað Schengen og við tilheyrum Dyflinarregluverkinu [sem fjallar um móttöku flóttafólks] þannig að það var alveg skýrt í íslenska samhenginu og raunar gagnvart meginlandinu líka, hverjir það voru sem hefðu borið ábyrgð á umsóknum, hefðu þær borist. Það var aldrei Ísland. En ég held að þetta kenni okkur líka og sýni okkur - sem ætti auðvitað að vera sjálfgefið - að stjórnvöld séu með allar upplýsingar þegar þau gefa frá sér yfirlýsingar.“
