Nítján ára gamall Norðmaður neitar sök fyrir Sakadómi Englands og Wales, dómstól sem í daglegu tali Breta gengur undir heitinu Old Bailey, þar sem hann er ákærður fyrir samsæri um manndráp eftir að lögregla handtók hann á hóteli í Huddersfield 19. mars í fyrra.
Fram kemur fyrir réttinum að Norðmaðurinn hafi haldið til Bretlands í því augnamiði að fremja manndráp á vegum glæpagengis Rawa Majid, „kúrdíska refsins“, Foxtrot, og slær breska ríkisútvarpið BBC því sérstaklega fram – og fleiri breskir fjölmiðlar – að Foxtrot tengist klerkastjórninni í Íran og vinni verk fyrir hana.
Þegar lögregla handtók manninn hafði hann í fórum sínum tvær skammbyssur, aðra hálfsjálfvirka, hina með snúningshólki, og tólf byssukúlur og telja saksóknarar málsins að vopnin og skotfærin hafi hann sótt í skóglendi í West Yorkshire eftir leiðbeiningum þess, sem réð hann til verksins, og eins hafi hann nálgast upphæð í reiðufé eftir svipuðum leiðbeiningum.
Norðmaðurinn gæti átt von á lífstíðarfangelsi verði hann sekur fundinn en mbl.is hefur fjallað um málið áður.
Ákærði kom til Manchester á neyðarvegabréfi sem hann hafði útvegað sér í Noregi áður en hann flaug frá Stavanger til Englands. Hafði hann þá verið í sambandi við yfirboðara sína á dulkóðuðum samfélagsmiðlum, menn sem kölluðu sig „Generalen“ og „Agent 47“, og tekið við leiðbeiningum en það var sá síðarnefndi sem bókaði ákærða í flug.
„Generalen“ handtekinn
Ákæruvaldinu er ekki kunnugt um hvert skotmarkið var en í málflutningi kemur fram að ákærða hafi á leiðinni til Bretlands orðið ljóst að „Generalen“ hafði verið handtekinn en fleiri voru handteknir í Noregi vegna málsins – og mála sem talin eru tengd því – og féll dómur nýlega yfir einum þeirra.
Við komuna til Manchester stöðvuðu breskir landamæraverðir ákærða og höfðu hann í haldi í stutta stund. Voru þeir tregir til að hleypa honum inn í landið þar sem hann var aðeins með 40 pund á sér og átti hvergi bókaða gistingu.
Hann gaf þá skýringu að hann væri á leið í heimsókn til vina sem hann hefði kynnst gegnum tölvuleikjaspilun á lýðnetinu. Landamæraverðir vildu þá hringja í móður hans en þessu hafnaði Norðmaðurinn á þeirri forsendu að hann væri orðinn átján ára.
Saksóknara komið á óvart
Þegar þarna var komið sögu hafði það verið ákveðið að Norðmanninum með neyðarvegabréfið yrði ekki hleypt inn í landið. Var honum þó veitt tímabundin landvistarheimild fram að flugi til Noregs fjórum dögum síðar og honum sleppt út af flugvellinum í Manchester – „óvænt niðurstaða“ segir Alistair Richardson saksóknari.
Ákæruvaldið lýsir því svo hvernig ákærði kom sér á hótelið í Huddersfield, fann reiðufé samkvæmt leiðbeiningum „Agent 47“, sótti skotvopnin og beið svo átekta.
„Hann hafði tekið að sér og ætlaði sér að fremja manndráp,“ segir Richardson af ákærða sem vopnuð sérsveit handtók á hótelinu.
Reiknað er með þremur vikum fyrir aðalmeðferð málsins fyrir Old Bailey.
