Rússlandsher drap hið minnsta 29 manns í sprengjuárás á hjálparmiðstöð í þorpinu Komyshuvakha í Zaporísja-héraði í gær, samkvæmt úkraínskum yfirvöldum. Tíu manns eru særðir eftir árásina og 48 er saknað. Héraðsstjórinn segir að í það minnsta níu 3.000 kílóa sprengjum hafi verið varpað á þorpið.
Volodymyr Zelenský Úkraínuforseti segir að eftir að Rússar hafi gert fyrstu árásina á skóla sem væri nýttur sem hjálparmiðstöð hafi önnur árás verið gerð á stað þar sem fólk leitaði skjóls.
Zelenský sagði í kvöldávarpi sínu að það hafi ekki getað farið fram hjá Rússum að íbúar þorpsins, sem enn eru eftir þar, fái mannúðaraðstoð í skólanum í hverri viku. Þá lýsti Zelenský yfir vonbrigðum yfir að eftir vopnahlé í bænum Oleshky í síðustu viku hefði verið tækifæri til að taka næstu skref í átt að friði en að það hefði ekki verið gert. Með drápum sem þessum sendi Rússland andstæð skilaboð.
Rússar sagðir hafa sært 62 í árás á heilbrigðisstofnun í nótt
Í nótt gerði Rússlandsher árás á heilbrigðisstofnun í borginni Kharkiv í samnefndu héraði og særði 62 manns. Flytja þurfti um 200 sjúklinga á brott, hefur úkraínski fjölmiðillinn Kyiv Independent eftir yfirvöldum.
Kharkiv er næststærsta borg Úkraínu. Þar býr um 1,4 milljón manna. Borgin er í 30 kílómetra fjarlægð frá landamærunum að Rússlandi.
Viðræður í Abú Dabí í næstu viku
Samninganefndir Úkraínu, Rússlands og Bandaríkjanna funda í Abu Dabí í Sameinuðu arabísku furstadæmunum í næstu viku, 10. og 11. nóvember. Erindrekar Bandaríkjanna ræða við fulltrúa Evrópusambandsins og NATO í Brussel í vikunni.
Steve Witkoff, sendifulltrúi Bandaríkjastjórnar, segir í færslu á samfélagsmiðlinum X að í Abu Dabí verði rætt um hvernig tryggja eigi öryggi eftir stríðið, mannúðaraðstoð og næstu skref í átt að friði.
