Auðjöfurinn Róbert Wessman hótar að flytja frá Bretlandi vegna sífelldrar ólgu vegna Brexit og breytinga í skattlagningu. Segir hann Bretland ekki land fyrir viðskipti lengur.
„Það er bara svo mikið sem allt kerfið hefur breyst, sem gerir það mjög erfitt, ekki bara fyrir útlendinga að koma hingað, heldur einnig fyrir auðugt fólk, sem býr hér, fæðist hér og hefur alltaf verið hér, að vera til,“ segir Róbert í nýju viðtali við viðskiptatímaritið Business Matters.
Róbert er einna þekktastur fyrir að vera forstjóri lyfjafyrirtækisins Alvotech, en hann er með fleiri járn í eldinum. Til að mynda vínframleiðslu undir merkinu Maison Wessman.
Róbert hefur búið í London síðan árið 2019. Þá opnaði hann þar líka skrifstofu fyrir fjárfestingarfélag sitt Aztiq. En nú lítur hann ekki á Bretland sem góðan stað fyrir viðskipti lengur. Ástæðan er bæði áhrifin sem útgangan úr Evrópusambandinu, Brexit, hefur haft sem og sífelldur hringlandaháttur og óvissa í skattlagningu.
„Á sama tíma er stöðugleikinn ekki raunverulega til staðar. Það var Brexit, það var stórt högg fyrir atvinnulífið, fyrir landið, fyrir fyrirtækin, og svo öll skattalöggjöfin núna,“ segir Róbert.
Auðmannaskattur snýst gegn löndum
Var Wessmann meðal annars spurður út í skatt á auðmenn. Hann sagði það geta snúist gegn ríkjum.
„Við sjáum þetta gerast í mörgum löndum og þetta getur verið vinsælt fyrir stjórnmálamenn,“ segir Róbert. „En að lokum eru lönd byggð á atvinnu, störfum, helst vel launuðum störfum, verðmætasköpun. Og vonandi er hægt að njóta góðs af því að hafa viðskipti í landinu.“
Synti gegn straumnum
Róbert Wessmann segist hafa synt gegn straumnum þegar hann flutti til Bretlands fyrir sjö árum síðan, en þá hafði Brexit verið samþykkt í þjóðaratkvæðagreiðslu. Segist hann hafa gert þetta til þess að hafa aukinn aðgang að mörkuðum í Asíu, Bandaríkjunum, mið og austur Evrópu. Eiginkona hans er rússnesk og sex börn þeirra eru í skólum í London.
„London er ótrúlegasta borgin til að búa í. Hún er með frábæra menntun. Hún hefur allt að bjóða Hún á sér ótrúlega sögu,“ segir Róbert. Hins vegar hafi allt byrjað að horfa til verri vegar með Brexit. Útgangan hafi verið alvarleg mistök. „Síðan Brexit eru stóru bankarnir hættir að nefna Bretland sem möguleika eða vettvang lengur.“
Skoðar Mílanó
Segist Róbert núna vera að líta í kringum sig með það fyrir augum að flytja frá Bretlandi. Hefur hann einkum verið að skoða að flytja til Mílanóborgar í Ítalíu.
„Ég sé ekki eftir því að borga háa skatta í Bretlandi,“ segir hann. „En þetta þarf að vera fyrirsjáanlegt. Ég þarf að setjast niður með skattaráðgjafanum mínum tvisvar eða þrisvar á ári til að reyna að sjá fyrir hvað sé að fara að gerast. Þetta er úti um allt. Það er ekki hvetjandi að búa hérna.“
