Reykjaböðin, baðlón við rætur Reykjadals í Hveragerði, voru opnuð fyrir gesti í gær. „Þetta er mjög spennandi,“ segir Brynjólfur J. Baldursson, stjórnarformaður og einn eigenda.
Unnið hefur verið að uppbyggingu á svæðinu síðastliðin fimm ár. Þar er kaffihús, sviflína og nú baðlón.
Nokkur fjöldi baðlóna hefur opnað síðastliðin ár. Inntur eftir því hvort hann hafi áhyggjur af því að þau séu orðin of mörg bendir Brynjólfur á að bæði Íslendingum og erlendum ferðamönnum þyki gaman að heimsækja baðlón víða um land.
„Þetta er mjög eðlileg þróun á okkar baðmenningu og ef það er eitthvað sérstakt við baðlónið þá held ég að það eigi alltaf erindi,“ segir hann.
Til dæmis sé lögð áhersla á félagslega þáttinn í baðlóninu. „Við erum með viðburðasvið og byggjum veitingastað og bar inn í baðlónið, svo þú getur bæði verið ofan í og upp úr.“
Reykjaböð hafa verið í byggingu síðastliðin tvö ár. „Við finnum fyrir miklum áhuga. [...] Við erum mjög ánægð með áhugann sem okkur er sýndur og vonum að við stöndum undir því,“ segir Brynjólfur.
