Leiðangursstjóri á Bandero, skipi Paul Watson-samtakanna, segir skipverja tilbúna að vera eins lengi og þörf er á við Íslandsstrendur til að stöðva hvalveiðar. Landhelgisgæslan fylgir skipinu eftir vestur af landinu.
Viðbúnaður staðið yfir frá því í maí
Viðbúnaðurinn er að frumkvæði Landhelgisgæslunnar, í samstarfi við dómsmálaráðuneytið og embætti ríkislögreglustjóra.
Undirbúningur hefur staðið yfir frá því í maí, þegar hótanir Paul Watson-samtakanna, um að binda enda á hvalveiðar við Íslandsstrendur, fóru að birtast á samfélagsmiðlum.
Leiðangurinn sem kallast Aðgerð 86 hefur vakið talsverða athygli utan landsteinanna en um helgina tók fréttaveita CNN viðtal við Paul Watson, forsvarsmann samtakanna.
Þá hefur leiðangurinn orðið til þess að búið er að aflýsa fyrirhuguðum hátíðahöldum í Vestmannaeyjum á miðvikudag í tilefni af 100 ára afmæli Landhelgisgæslunnar.
Hafa ekki haft upp á Hvali 8 eða 9
Slökkt var á staðsetningarbúnaði Bandero áður en skipið sigldi inn í íslenska efnahagslögsögu um helgina og fyrst um sinn sniðgekk áhöfnin kröfu gæslunnar um að kveikja á því – en deilir nú staðsetningu á klukkustundar fresti. Hvalveiðiskipin Hvalur 8 og Hvalur 9 eru sömuleiðis með slökkt á staðsetningarbúnaði af öryggisástæðum.
„Við vitum ekki hvar þau [skipin] eru núna en við vonumst til að Íslendingar láti okkur vita ef þeir sjá þessi skip einhvers staðar á svæðinu. Annars erum við að vakta. Við erum einnig með fólk sem er að aðstoða okkur og gefa upp staðsetningar,“ segir Ron Coronado, leiðangursstjóri á Bandero.
Coronado vill ekki gefa upp hvar skipið Bandero er, en heimildir fréttastofu herma að það sé vestur af landinu. Hann segir skipverja, sem telja vel á þriðja tug, viðbúna að vera við strendur Íslands eins lengi og þörf er á. Skipið sé útbúið eldsneyti og vistum sem dugi þeim í mánuð. Þeir hyggist fara til Írlands til að taka eldsneyti þegar þörf verður á en snúa svo aftur til Íslands.
„Við erum friðsöm samtök, en við trúum á það að vera framsækin án ofbeldis og við erum tilbúin að leggja líf okkar í hættu til að bjarga þessum hvölum. Við munum nota skip okkar, við munum nota líkama okkar og allar tiltækar leiðir án ofbeldis sem eru tiltækar,“ segir Coronado.
„Við höfum aldrei skaðað neinn enn þá, og þetta er það sem við gerðum fyrir 40 árum, þegar leiðangrarnir gegn Hval 6 og Hval 7 fóru fram. Við erum aftur tilbúin að grípa til allra nauðsynlegra aðgerða til að stöðva frekari veiðar á langreyðum.“
Einn tveggja sem sökkti hvalveiðiskipunum Hval 7 og 8
Coronado er einn tveggja aðgerðasinna samtakanna Sea Sheperd sem laumuðust inn í hvalstöðina í Hvalfirði í nóvember 1986 og eyðilögðu tölvur og vélar með sleggjum. Sömu nótt fóru þeir að Reykjavíkurhöfn og sökktu Hval 6 og Hval 7, tveimur af fjórum hvalveiðiskipum landsins, með því að opna botnlokur. Vélarrúm fylltust af sjó og sukku á hálftíma. Enginn slasaðist en tjónið nam tugum milljóna króna.
„Ég vonaðist svo sannarlega ekki til að lenda í þessari stöðu aftur – og ég vil biðjast afsökunar á því á því þegar ég kom hingað síðast. Ég kom hingað að nóttu til og laumaðist inn í landið og út úr því. Mér fannst mikilvægt að koma að degi til í þetta skiptið. Láta fólk vita af ásetningi okkar fyrir fram, í von um að íslensk yfirvöld grípi til aðgerða.“
Myndatökumaður fréttastofu var í Hvalfirði á sjötta tímanum í kvöld þegar Hvalur 9 kom inn til löndunar með tvær langreyðar. Hvorki Bandero né varðskipið Þór voru þar sjáanleg.
Rétt er að taka fram að fréttastofa falaðist eftir viðtali við Kristján Loftsson, forstjóra Hvals, vegna aðgerðanna en fékk ekki svör við þeim beiðnum.
