Stormviðri og úrhellisrigning hefur leikið íbúa grísku eyjarinnar Krítar grátt í vikunni. Einn er látinn og flætt hefur yfir vegi og inn í hús. Þetta hefur fréttaveitan EBU eftir gríska ríkisútvarpinu ERT.
Veðrahamurinn hófst á miðvikudag og tók ekki að réna fyrr en í gær. Hvassviðri og miklum rigningum er þó áfram spáð fram eftir degi í dag.
Veðrið hefur haft töluverð áhrif á rafkerfið á Krít en rafmagnsstaurar hafa hrunið og rafmagnsleysis gætt í nokkrum bæjum.
Þá var skólum víða lokað á meðan veðrið gekk yfir og fólk hvatt til að halda sig heima nema nauðsyn bæri til.
Tilkynnt um eitt dauðsfall
Í þorpinu Livadia á vesturströnd eyjarinnar sópaði vatnsflaumur hluta brúar með sér og bíll með tveimur innanborðs lenti í ánni, hermir fréttamiðillinn Euronews. Þau voru flutt á sjúkrahúsið í Heraklion en ekki er vitað um ástand þeirra.
Samkvæmt EBU hefur verið tilkynnt um eitt dauðsfall vegna stormsins en sjötíu og níu ára gamall smali fannst látinn í gær eftir að vatnsmikið fljót hreif hann með sér.
