Segja ástandið versna hratt
Tólf vestrænar þjóðir, þar á meðal Íslendingar og aðrar norrænar þjóðir, tilkynntu í fyrradag um refsiaðgerðir sem beinast gegn landránsfólki og byggðum þess á Vesturbakka Jórdan-ár. Boðað er viðskiptabann á landtökubyggðir Ísraelsmanna í Palestínu og innflutningsbann á vörum sem eru framleiddar þar, það eru aðallega appelsínur, avókadó, döðlur, mangó, ólífuolíur, vín og vínber.
Auk Norðurlandanna standa Bretland, Frakkland, Írland, Kanada, Portúgal, Pólland og Spánn að yfirlýsingunni. Löndin tólf segja í yfirlýsingunni að ástandið hafi versnað hratt vegna fordæmalauss ofbeldis af hálfu landtökumanna og stækkunar landtökubyggða. Þarna vekur athygli að Þjóðverjar eru ekki með en stefna þeirra gagnvart Ísrael hefur ætíð verið afar varkár vegna sögulegra ástæðna. Það virðist sem Bretar, Frakkar og Kanadamenn hafi haft forgöngu um refsiaðgerðirnar.
Stefnubreyting Breta fær mesta athygli
Þátttaka í refsiaðgerðum er nokkuð róttæk stefnubreyting bresku stjórnarinnar gagnvart Ísrael. Hingað til hafa Bretar ekki mótmælt landnámi Ísraelsmanna á herteknu svæðunum. Í ræðu sinni í breska þinginu þegar tilkynnt var um aðgerðirnar sakaði Ed Miliband, utanríkisráðherra Breta, terrorista í hópi landtökufólksins um þjóðernishreinsanir. Hann sagði að refsiaðgerðunum væri ekki beint gegn ísraelsku þjóðinni, samband Breta við hana væri órjúfanlegt. Bretar gætu hins vegar ekki sætt sig við framferði Ísraelsstjórnar. Það sem vekti fyrir bresku stjórninni væri að bjarga tveggja ríkja lausninni sem væri eina raunhæfa leiðin til friðar og öryggis fyrir bæði Ísraelsmenn og Palestínumenn.
Andstaða við landrán er ekki gyðingahatur
Ed Miliband sagðist hafa skýlaus skilaboð til Breta og annarra þjóða; ef fólk gerði breska gyðinga ábyrga fyrir aðgerðum Ísraelsstjórnar væri það ekkert annað en anti-semitismi, gyðingandúð eða gyðingahatur. Hann lagði áherslu á að hann væri sjálfur gyðingur.
Með leyfi forseta ætla ég að flytja yfirlýsingu um Ísrael og Palestínu. Ég geri það sem stoltur breskur gyðingur sem er ævinlega þakklátur Ísraelsríki fyrir að hafa verið heimili ömmu minnar eftir að hún missti mann sinn, afa minn, og 60 aðra ástvini í ofsóknum nasista.
Miliband ræddi síðan um tilverurétt Ísraelsríkis, ógnanir sem steðjuðu að því, árásir Hamas 7. október 2023, hættuna frá Íran og Hisbolla í Líbanon. Bretar styddu tilverurétt Ísraelsríkis og rétt þess til þess að verja sig.
Ísraelsstjórn vildi hindra tveggja ríkja lausn
Fréttaskýrendur telja að ríkin tólf grípi til aðgerða nú vegna útboðs Ísraelsstjórnar á byggingu á nýju svæði sem kallast E-1 og er alveg við Austur-Jerúsalem sem Palestínumenn líta á sem höfuðborg ríkis síns. Með byggingu á þessu svæði yrðu engin landfræðileg tengsl á milli Vesturbakkans og Jerúsalem, allt land í kringum borgina yrði undir stjórn Ísraelsmanna. Flestir líta svo á að þar með væri afar erfitt að stofna ríki Palestínumanna og það er einmitt yfirlýstur tilgangur Ísraelsstjórnar að koma í veg fyrir tveggja ríkja lausnina á deilunni.
Ofbeldið færist stöðugt í aukana
Landránsfólkið á Vesturbakkanum hefur beitt síauknu ofbeldi síðustu mánuði og nýtur stuðnings stjórnvalda. Hernámslið Ísraels gerir nánast ekkert til að stöðva ofbeldi, árásir og morð landránsliðsins heldur hefur það fengið vopn frá hernum. Herinn hefur byggt múra og sett upp eftirlitsstöðvar víða sem gera Palestínumönnum afar erfitt að ferðast um sitt eigið land. Samkvæmt Flóttamannahjálp Sameinuðu þjóðanna í Palestínu hafa Ísraelsmenn drepið 1.122 Palestínumenn á Vesturbakkanum frá 7. október 2023, þar af 246 börn.
Hörð viðbrögð Ísraelsstjórnar
Viðbrögð Ísraelsstjórnar hafa verið mjög hörð gagnvart Bretum en ekki hefur verið tilkynnt enn um gagnaðgerðir gegn öðrum ríkjum. Ísraelsstjórn ætlar að loka ræðismannsskrifstofu Breta í Austur-Jerúsalem en hún hefur starfað sem óopinbert sendiráð Breta gagnvart stjórn Palestínumanna. Þá mega Bretar ekki lengur senda fólk til að þjálfa öryggissveitir Palestínumanna á Vesturbakkanum og nokkrir breskir stjórnmálamenn fá ekki lengur að koma til Ísraels.
Gagnrýni gyðinga og stjórnarandstöðunnar
Heima fyrir í Bretlandi er ríkisstjórn Andy Burnhams gagnrýnd fyrir refsiaðgerðirnar og yfirrabbíni Bretlands, sir Ephraim Mirvis, sagði þessar ráðstafanir stefna öryggi breskra gyðinga í hættu. Því hafnar Miliband. Sumir aðrir leiðtogar breskra gyðinga hafa lýst stuðningi við refsiaðgerðirnar.
Stjórnarandstaðan segir Andy Brunham vera að þóknast þeim sem eru lengst til vinstri í Verkamannaflokknum og reyna að höfða til múslímskra kjósenda fyrir aukakosningarnar í kjördæmi Keir Starmers þar sem Zack Polanski, leiðtogi Græningja, ætlar að bjóða sig fram. Polanski, sem sjálfur er gyðingur, hefur verið mjög gagnrýninn á stefnu ísraelsku stjórnarinnar.
Ástsæll konungur borinn til grafar
Haraldur fimmti Noregskonungur var borinn til grafar á miðvikudag. Hann naut mikilla vinsælda og virðingar meðal Norðmanna. Haraldur fylgdi að mestu sið konungborinna að skipta sér ekki af pólitískum deilumálum. Þó minntust margir ræðu sem hann hélt 2016 þar sem fagnaði fjölbreytileika Norðmanna.
Norðmenn eru Norðlendingar, Þrændur, Suður-Norðmenn og frá öllum öðrum hlutum landsins. Norðmenn eru líka innflytjendur frá Afganistan, Pakistan, Póllandi, Svíþjóð, Sómalíu og Sýrlandi. Norðmenn eru stelpur sem eru hrifnar af stelpum, strákar sem eru hrifnir af strákum og stelpur og strákar sem eru hrifin hvert af öðru. Norðmenn trúa á guð, allah, allt og ekkert.
Konungsfjölskyldan verður að halda sig frá flokkapólitík
Hákon, sem nú er orðinn Noregskonungur, var gestur í Viðtalinu þegar hann var í heimsókn á Íslandi fyrir fjórum árum. Þá var hann spurður um þátttöku konungsfjölskyldunnar í þjóðmálaumræðu. Hann svaraði að konungsfjölskyldan mætti ekki taka beinan þátt í slíkri umræðu, konungsfjölskyldan yrði að halda sig frá flokkspólitískri umræðu, það væri hlutverk stjórnmálamanna, en þau mættu tala um grundvallaratriði sem væru mikilvæg fyrir alla, þar væri hlutverk fyrir þau, hluti eins og baráttu gegn fátækt, loftslags- og umhverfismál og að vernda réttindi upprunafólks. Það væri mikilvægt að konungsfjölskyldan legði sitt af mörkum í slíkri umræðu.
Hörkuspennandi kosningar í Svíþjóð
Svíar ganga til kosninga sunnudaginn 13. september. Þá eru þing-, landsþings- og sveitarstjórnarkosningar. Spennandi kosningabarátta fyrir þingkosningarnar vekur mesta athygli. Skoðanakannanir benda til þess að mjótt verði á mununum milli núverandi ríkisstjórnarflokka og stjórnarandstöðunnar. Bilið sem var um tíu prósentustig fyrir mánuði hefur minnkað mjög. Frjálslyndi flokkurinn, Liberalerna, hefur sótt í sig veðrið en útlit var fyrir að flokknum tækist ekki að afla sér fylgis fjögurra prósenta kjósenda sem er nauðsynlegt til að fá mann kjörinn á þing. Ný könnun spáir þeim 5, 8 prósenta fylgi og þar með aukast verulega líkurnar á að ríkisstjórn Ulfs Kristerssons haldi velli.
