Ekki er útlit fyrir að hægt verði að sigla Vestmannaeyjaferjunni Herjólfi til Landeyjahafnar næstu daga, en hún hefur verið lokuð mestallt árið vegna sandburðar. Á meðan hefur verið siglt til Þorlákshafnar sem er mun lengri leið.
G. Pétur Matthíasson upplýsingafulltrúi Vegagerðarinnar segir að staðan í Landeyjahöfn sé alls ekki góð. Dæla þarf sandi úr Landeyjarhöfn svo hægt sé að sigla þaðan. Í morgun náðist að dýpka nokkuð, en nú er veðurspá óhagstæð þannig að útlit er fyrir að ekki verði hægt að dýpka fyrr en á fimmtudag eða föstudag.
Útséð er með að hægt verði að sigla frá Landeyjahöfn til Vestmannaeyja um helgina en þá stendur til að halda útihlaupið Puffin Run.
„Nánast víst að það náist ekki“
G. Pétur Matthíasson er ekki bjartsýnn. „Ég held að það sé alveg óhætt að segja að það sé ómögulegt að ná því, því að dýpið var það lítið í síðustu mælingu, en það er það mikið eftir að dýpka að það er nánast víst að það náist ekki, ekki á einum degi,“ segir hann.
Hann segir náttúruöflin stjórna ferlinu alfarið en það er einungis hægt að dæla sandi úr höfninni þegar vel viðrar. „Það þurfa í fyrsta lagi að vera nokkuð margir góðir dagar þar sem hægt er að vinna á flóðinu. Það þarf að byrja að vinna á flóðinu af því að dýpið er það lítið. Og síðan gengur svo sem hraðar þegar hægt verður að dýpka allan sólarhringinn en það er ekki komið að því þannig að við getum ómögulega sagt til um hvenær þetta kemst í viðunanlegt horf. En við vonum það besta alltaf,“ segir G. Pétur.
Landeyjahöfn hefur verið lokuð í rúmlega 80 daga það sem af er ári. Herjólfur er 35 mínútur að sigla í Landeyjahöfn, samanborið við tæpar þrjár klukkustundir í Þorlákshöfn.
