Snædís bauð upp á lambatartar með skessujurtakremi, gröfnum eggjarauðum, stökkum jarðskokkum og grilluðu flatbrauði.  Einnig grilluð lambaspjót og hvítan aspas borinn fram með ferskum sprettum.

„Þvílíkir bragðheimar sem Snædís bauð upp á, lambatartarnir og þetta gremolada með kerflinum eru hreint sælgæti að njóta. Örlítill lakkrískeimur í bland við ferskar kryddjurtir sem minna á íslenska náttúru leika aðalhlutverkið í forréttinum og passa fullkomlega með grillaða flatbrauðinu."

Þáttinn og uppskriftirnar er að finna hér fyrir neðan.

Lambatartar með skessujurtakremi, gröfnum eggjarauðum, stökkum jarðskokkum og grilluðu flatbrauði

Lambatartar

• 250 g lambainnanlæri frá Krónunni
• Skalottlaukur eftir smekk
• 1-2 msk. ferskur graslaukur
• 1 msk. sinnepsfræ, pikkluð
• Fiskisósa eftir smekk

Snyrtið lambainnanlærið og skerið í litla teninga.  Blandið saman skalottlauk, graslauk og sinnepsfræjum og smakkið til með fiskisósunni.

Skessujurtakrem

• 75 g skessujurt (hægt að tína í garðinum eða úti í náttúrunni)
• 2 linsoðin egg, sjóðið í um það bil 4 mínútur áður en þið setjið þau út í blönduna.
• 200 g ólífuolía
• 1 msk. dijon
• Salt eftir smekk
• Sítrónusafi eftir smekk

Setjið allt hráefnið saman í matvinnsluvél og blandið vel saman. Hellið síðan ólífuolíunni rólega út í blönduna. Bætið við sítrónusafa ef vill. Gott er að hafa fallega kremáferð á skessujurtakreminu.

Stökkir jarðskokkar

• Jarðskokkar eftir smekk og þörfum
• Olía eftir þörfum

Þetta er hægt að gera daginn áður, þess vegna nokkrum dögum áður og eiga til í glerkrukku með loki.  Byrjið á því að skera jarðskokka í þunnar sneiðar.  Hitið olíu á pönnu í 140 °C hita.  Djúpsteikið þá síðan upp úr olíunni þar til þeir verða fallega gullinbrúnir.  Takið síðan upp úr olíunni og sigtið olíuna frá á eldhúspappír.  Stráið að lokum salti yfir þá.

Grafin eggjarauða

Það er í góðu lagi að sleppa gröfnum eggjarauðum ef vill en athugið að gott er að gera þær deginum áður en bera á réttinn fram.

• 4 eggjarauður
• 200 g salt
• 200 g sykur

Blandið sykri og salti saman við og leggið eggjarauðurnar á sykur og saltblönduna og stráið vel yfir eggjarauðurnar.  Látið liggja inni í kæli yfir nótt.  Setjið síðan á ofnplötu klædda bökunarpappír og þurrkið í bakarofni við 45°C hita í um það bil 5 klukkustundir.

Samsetning

Setjið skessujurtakremið í botninn á skálinni eða disknum og setjið svo lambatartarinn ofan á. Rífið síðan eggjarauðurnar yfir og dreifið krispí jarðskokkunum yfir að lokum og berið fram með grilluðu flatbrauði, sjá uppskrift fyrir neðan.

Flatbrauð

• 180 ml vatn
• 300 g Typo 00 hveiti
• 9 g salt
• 3,6 g ger

Hitið vatnið upp í 40°C hita.  Setjið gerið út í og leyfið því að liggja í vatninu þar til það freyðir.  Blandið síðan öllu saman og vinnið deigið hægt og rólega.  Látið hefast í um það bil klukkustund.  Skiptið deiginu síðan í nokkrar jafnstórar kúlur og fletjið út með höndum.  Grillið á funheitu grillinu í um það bil 3 mínútur á hvorri hlið.

Grillað lambaspjót með kerfil gremolada, stökkri svartrót og bbq-gljáa borið fram með hvítum aspas

Lambaspjót að hætti Snædísar

• 500 g lambamjöðm frá Krónunni
• Marinering fyrir lambakjötið, sjá uppskrift fyrir neðan
• Lambagljái, sjá uppskrift fyrir neðan
• Stökkur jarðskokkar, sjá uppskrift fyrir neðan

Skerið í nokkra jafnstóra bita sem passa vel á grillspjót.  Lagið marineringuna og penslið yfir bitana og látið liggja í um það bil 30 mínútur eða lengur, sjá uppskriftina fyrir neðan.  Raðið síðan bitunum á grillspjótin.  Penslið með lambagljánum. 

Hitið grillið upp í mesta hita.  Grillið lambaspjótin í um það bil 10 til 15 mínútur eða eftir þörfum.  Gott er að láta þau hvíla í stutta stund áður en þau eru borin fram.  Skreytið með stökkum jarðskokkum, sjá uppskrift fyrir neðan.

Marinering

• 2 tsk. reykt paprika
• 2 tsk. paprika
• 1 tsk. hvítlaukskrydd Mabrúka
• 1 tsk. kúmen Mabrúka
• 2 g salt
• 20 ml ólífuolía

Setjið allt hráefnið saman í skál og hrærið vel saman.  Má gera daginn áður og eiga í kæli.

Lambagljái

• 60 g tómatar í niðursuðudós
• 100 g púðursykur
• 60 g eplaedik
• 40 g BBQ
• 5 g paprikuduft
• 5 g kóríanderfræ
• 1 stk. anísstjarna
• 1 stk. hvítlauksrif

Setjið allt hráefnið saman í pott og sjóðið niður um helming.  Smakkið til með salti og eplaediki.  Pensla síðan yfir spjótin á meðan maður grillar og einnig er gott að setja beint eftir grillið.

Stökk svartrót

• Svartrót eftir smekk og þörfum
• Olía eftir þörfum

Þetta er hægt að gera daginn áður, þess vegna nokkrum dögum áður og eiga til í glerkrukku með loki.  Byrjið á því að skera jarðskokka í þunnar sneiðar.  Hitið olíu á pönnu í 140 °C hita.  Djúpsteikið þá síðan upp úr olíunni þar til þeir verða fallega gullinbrúnir.  Takið síðan upp úr olíunni og sigtið olíuna frá á eldhúspappír.  Stráið að lokum salti yfir þá.

Kerfill í gremolada

• 15 g ferskur kerfill
• 10 g fersk steinselja
• 10 g fersk skessujurt
• 5 g skalottlaukur
• 1 stk. hvítlauksgeiri
• 2 g eplaedik
• 1 sítróna, börkurinn rifinn niður
• Salt eftir smekk

Saxið allar kryddjurtirnar og laukana fínt niður og smakkið síðan til með salti.

Grillaður hvítur aspas með noisett, möndluflögum og afilakressu

• 8 hvítur aspas
• 4 msk. noisett, brúnað smjör
• Ristaðar möndluflögur eftir smekk
• Afilakress eftir smekk, ferskar sprettur
• Ferskur sítrónusafi eftir smekk

Skerið aspasinn í helminga og stráið olíu og salti yfir.  Grillið á funheitu grilli í um það bil 2 mínútur á hvorri hlið.  Setjið svo á ílangan disk.  Stráið sítrónusafa yfir aspasinn og síðan noisett, brennda smjörinu og ristuðu flögunum yfir.  Gaman að setja ferskt afilakress yfir ef þið eigið það til.

Noisette, brúnað smjör

• 300 g smjör

Setjið smjörið í pott og sjóðið upp í 148 °C hita og takið af grillinu.  Þið megið líka sjóða smjörið inni á hellu í stað þess að bræða það á grillinu.  Smjörið endar svo upp í 155°C hita og þá er það klárt.  Sigtið saltið frá með sigtiklút eða grisju.

Allt hráefnið fæst í Krónunni og sumar kryddjurtir má fá úti í íslenskri náttúru, eins og skessujurt og kerfil.