Sveitarstjórn Þingeyjarsveitar hefur ráðið Katrínu Sigurjónsdóttur í starf sveitarstjóra Þingeyjarsveitar. Alls bárust 15 umsóknir um starfið en sex drógu umsóknir sínar til baka meðan á ráðningarferlinu stóð.
Gerður Sigtryggsdóttir var áður sveitarstjóri. Hún tók við þegar Ragnheiði Jónu Ingimarsdóttur var sagt upp síðasta haust.
Þrír listar buðu fram í sveitarstjórnarkosningunum í vor. Á-listi Ábyrgðar hlaut 49,12% kosningu og fjóra sveitarstjórnarfulltrúa. L-listi framfara fékk 29,22% atkvæða og tvo fulltrúa og N-listinn hlaut 21,66% kosningu og einn fulltrúa. Enginn listanna bauð fram í sveitarstjórnarkosningunum 2022.
Katrín hefur störf í ágúst. Hún er Borgfirðingur, fædd 1968 og hefur áður gegnt stöðu sveitarstjóra hjá Dalvíkurbyggð og Norðurþingi auk þess að hafa verið kjörinn fulltrúi í sveitarstjórn Dalvíkurbyggðar. Þá vann hún um árabil við stjórnunar- og útflutningsstörf hjá Sölku-Fiskmiðlun hf.
Katrín er stúdent frá Samvinnuskólanum og hefur lokið námi í rekstrar- og viðskiptafræðum frá Háskólanum á Akureyri. Þá hefur hún lokið námi í markþjálfun frá Evolvia og er viðurkenndur stjórnarmaður frá Akademias. Katrín er gift Hauki Snorrasyni og eiga þau þrjú uppkomin börn.
„Ég er afskaplega þakklát fyrir það traust sem sveitarstjórn Þingeyjarsveitar sýnir mér með því að fela mér starf sveitarstjóra. Það eru forréttindi að fá að vinna að uppbyggingu samfélagsins með kjörnum fulltrúum, frábæru starfsfólki og íbúum sveitarfélagsins og ég hlakka mikið til að hefja störf,“ er haft eftir Katrínu í tilkynningu frá Þingeyjarsveit.
„Við höfum fulla trú á að fram undan sé traust og farsælt samstarf í fjölbreyttum verkefnum á kjörtímabilinu,“ segir Knútur Emil Jónasson, oddviti Þingeyjarsveitar.
