Aðalmeðferð í Dettifossmálinu svokallaða hófst í Héraðsdómi Reykjavíkur í morgun. Alls eru fjórir ákærðir og snýst málið um smygl á rúmum 14 lítrum af amfetamínbasa til landsins með Dettifossi, gámaskipi Eimskips.
Sævar Örn Hilmarsson og Kastriot Pepa eru taldir hafa skipulagt innflutninginn og tveir skipverjar, sem voru starfsmenn Eimskips, eru taldir hafa tekið við efnunum í Þýskalandi og flutt þau til landsins með gámaskipinu Dettifossi.
Sævar Örn og Kastriot gáfu skýrslu fyrir dómi eftir hádegi. Báðir neita þeir sök í málinu.
Áttu í samskiptum við „Cloud“
Aðalmeðferðin hófst á því að skipverjarnir tveir gáfu skýrslu. Þeir játuðu báðir sök að hluta við þingfestingu og lýstu því fyrir dómi í dag að þeir hefðu átt í samskiptum við aðila sem kallaði sig „Cloud“ á dulkóðaða samskiptaforritinu Signal. Sá hefði sagt þeim hvar og hvenær þeir ættu að taka við efnunum.
Ákæruvaldið og lögregla telja að Sævar Örn sé Cloud og hafi verið sá sem leiðbeindi skipverjunum.
Hvorugur skipverjanna vildi fullyrða að svo væri en þeir sögðust báðir þekkja til Sævars. Sævar sagðist einnig hafa átt í smávægilegum samskiptum við þá en ekki í tengslum við þetta mál.
„Treysti ekki ákæruvaldinu til að gæta hlutleysis“
Sævar neitaði að svara spurningum ákæruvaldsins en las upp yfirlýsingu sem hann sagðist hafa útbúið með verjanda sínum. Hann sagðist ekki hafa átt neina aðkomu að því að skipuleggja eða flytja inn efnin. Hann væri ekki viðriðinn málið með neinum hætti.
Hann kvaðst ekki myndu svara spurningum frá sækjanda þar sem hann treysti ákæruvaldinu ekki til að gæta hlutleysis við málsmeðferðina eða að lesa úr gögnum málsins.
Sævar sagðist ekki hafa upplifað að hlutleysis hefði verið gætt við rannsókn málsins og tók fram að hlutir hafi verið gerðir upptækir við húsleit á heimili hans sem kæmu málinu ekki við á neinn hátt, og að þeim hafi ekki verið skilað.
Það að lögregla teldi síma, sem „Cloud“ sendi skilaboð úr, hafa verið tengdan internetinu heima hjá honum sannaði ekki að hann ætti nokkurn hlut að máli.
Verið á slæmum stað í upphafi árs en þó ekki komið að neinum innflutningi
Sævar lýsti því svo að hann hefði „misst fótanna í byrjun árs“ og verið á slæmum stað. Konan hans hafi gengið út og hann verið niðurbrotinn þegar lögregla réðst inn á heimili hans í apríl og handtók hann. Þó að hann hafi verið á slæmum stað þýddi það þó ekki að hann stæði í fíkniefnainnflutningi.
Hann ítrekaði aftur að hann væri saklaus af því sem honum væri gefið að sök varðandi innflutninginn en svaraði engum spurningum.
Því næst kom Kastriot Pepa fyrir dóminn og gaf skýrslu með aðstoð túlks – en hann talar albönsku. Beðinn um að lýsa aðkomu sinni að málinu sagðist hann ekki tengjast málinu og að hann hefði ekkert með það að gera.
„Við erum fjölskylda.“
Spurður út í annan ákærulið er varðaði lítið magn stera og kannabisefna á heimili hans sagðist hann ekki kannast við kannabisefnið; lögregla hefði líklega komið þeim fyrir þegar hún ruddist inn og handtók hann.
Kastriot sagðist ekkert þekkja skipverjana tvo og hafa bara kynnst þeim í fangelsi eftir að þeir voru handteknir. Spurður um tengsl sín við Sævar lýsti hann Sævari sem „bróður, besta vini, við erum fjölskylda“.
Mikill samgangur væri á milli fjölskyldnanna þar sem börnin væru vinir og eiginkonur hans og Sævars bestu vinkonur. Kona hans kynntist konu Sævars fyrir fimm árum þegar hún hóf að sinna þrifum á heimili Sævars og fjölskyldu hans og þær orðið nánar vinkonur.
Hann lýsti samskiptum milli sín og Sævars þó sem litlum, konur þeirra töluðu meira. Kastriot sagði að þeir töluðu saman ensku þegar þeir ættu samskipti, þá litlu ensku sem Kastriot talar.
Sækjandi birti þá skilaboð á milli áðurnefnds „Clouds“ og annars aðila sem einnig var undir dulnefni á Signal, sem kallaði sig „Milan“.
Kastriot neitaði alfarið að vita nokkuð um samskipti Clouds og Milan – hann vissi ekki um hverja ræddi. Sækjandi sýndi þá skilaboð frá Milan til Cloud, á ensku, þar sem Milan spyr Cloud: „Kemur þú og [nafn konu Sævars] með börnin á morgun?“
Aftur sagðist Kastriot ekki kannast við skilaboðin. Þá voru birtar myndir af honum í minigolfi annars vegar og ræktinni hins vegar, þar sem hann virðist vera að skrifa á síma á sama tíma og skilaboð bárust frá Milan til Cloud. Kastriot sagðist ekki muna eftir því hvað hann hafi verið að gera í símanum.
Bæði Sævar og Kastriot segjast enga aðkomu hafa haft að skipulagningu eða innflutningi amfetamínbasans.
