Mannréttindasamtökin Amnesty International fordæma harðlega áform fimm ríkja Evrópusambandsins um að koma upp brottvísunarstöð í ríki utan sambandsins.
Anna Lúðvíksdóttir, framkvæmdastjóri Amnesty International á Íslandi, segir slíkar brottvísunarstöðvar í eðli sínu með þeim hætti að þær brjóti á réttindum fólks. Hún segir alltaf hættu á alvarlegum mannréttindabrotum innan slíkra búða.
„Við höfum sagt að þarna sé möguleikinn á svartholi fyrir mannréttindabrot þar sem fólk er fært út fyrir Evrópu. Þessum búðum er hreinlega útvistað til landa þar sem mögulega er mannréttindum fótum troðið nú þegar,“ sagði Anna í sjónvarpsfréttum RÚV.
Tryggja þarf að mannréttindi séu virt
Anna kallar eftir meiri fjárveitingu í þennan málaflokk.
„Það er alveg ljóst að það þarf að taka á móti fólki sem leitar sér alþjóðlegrar verndar vegna þess að það er að flýja átök og ofsóknir. Það þarf að gera það með mannúðlegum hætti og þar sem mannréttindi eru virt í hvívetna.“
Þegar komi að því að búa til kerfi þar sem endursendingar verði segir Anna að tryggja þurfi að öll mannréttindi og grundvallarréttindi viðkomandi séu virt.
