Góð kjörsókn framan af degi sýnir hversu heitt ágreiningsmál Evrópusambandsaðild er, segir stjórnmálafræðingur. Hún ræður þó ein og sér ekki úrslitum.
„Það lítur allt út fyrir að kjörsókn verði með besta móti og það er kannski ekki að undra. Þetta er búið að vera pólitískt ágreiningsmál um langt skeið og áhugi landsmanna virðist vera töluvert mikill á því að taka þátt í þessum kosningum,“ segir Hafsteinn Birgir Einarsson, nýdoktor í stjórnmálafræði.
Frá stofnun lýðveldis hafa Íslendingar þrisvar gengið að kjörklefanum í þjóðaratkvæðagreiðslu, síðast árið 2012.
Hafsteinn segir að það merkilegasta við kosningarnar nú sé að þær snúist aðeins um eitt mál en ekki fleiri líkt og áður.
„Og auðvitað það sem gerir þær mest spennandi er að kannanir hafa bent til þess að hér sé mjög mjótt á munum. Og það sem við bíðum öll eftir að sjá er hvað kemur upp úr kjörkössunum,“ segir Hafsteinn.
„Og þó að kannanir bendi til þess að þetta sé jafnt þá gæti alveg vel verið að eitthvað hafi gerst á síðustu metrunum eða að afstaðan sé einfaldlega þannig að niðurstaðan ráðist fljótt í kvöld. En ég er spenntur.“
Kjörsókn verði líklega meiri en í alþingiskosningunum
Hafsteinn telur að kjörsóknin ráði þó ekki úrslitum um niðurstöðu kosninganna. Fáir hafi hvata til þess að sitja heima þegar skoðanakannanir eru eins jafnar og raun ber vitni.
„Ég myndi halda að einfaldlega vegna þess hversu stórt ágreiningsefni þetta er að kjörsókn verði í kringum það sem við sáum í síðustu Alþingiskosningum, jafnvel meiri. Ég veit það ekki. Þetta verður að koma í ljós síðar í kvöld.“
