Giorgia Meloni skráði nöfn sín í sögubækurnar í dag þegar hún varð sá forsætisráðherra Ítalíu sem setið hefur lengst samfellt eftir að seinni heimsstyrjöld lauk.
Hún hefur gegnt embætti forsætisráðherra í 1.413 daga samfellt. Þar með sló hún met Silvios Berlusconis sem varð þrisvar forsætisráðherra og gegndi því embætti í samanlagt rúm níu ár. Lengsta samfellda valdatíð hans var 1.412 dagar.
Ítalía var löngum það land Evrópu þar sem stjórnarskipti voru tíðust. Á síðustu 80 árum hafa 68 ríkisstjórnir verið við völd. Þó hefur dregið mjög úr þeim óróa hin síðari ár og áratugi.
Meloni fagnaði tímamótunum í dag og lýsti bæði þakklæti og ábyrgðartilfinningu. Hún sagði að stöðugleiki í stjórnarfari væri forsenda fyrir því að þjóðir gætu skipulagt sig, tekið ákvarðanir, staðið við þær og notið virðingar.
Búist er við því að þúsundir stuðningsmanna Meloni taki þátt í hátíð til að fagna tímamótunum.
Valdatíð Meloni hefur nú staðið yfir í þrjú ár og tíu mánuði. Hún á nokkuð í að ná þaulsætnustu forsætisráðherrum Íslands. Davíð Oddsson var forsætisráðherra í rúm 13 ár samfellt. Bjarni Benediktsson eldri var forsætisráðherra í tæp sjö ár frá 1963 til 1970 og Katrín Jakobsdóttir álíka lengi frá 2017 til 2024.
