Meira en fjórðungur nær ekki grunnhæfni á neinu sviði PISA
Aðeins 56 prósent íslenskra nemenda ná grunnhæfni í lesskilningi, samanborið við 78 prósent fyrir tíu árum, og Ísland er fjórða neðst meðal 38 OECD-ríkja í lesskilningi. Þrátt fyrir slakan námsárangur mælast íslenskir nemendur hátt í vellíðan, félagslegum tengslum og þrautseigju í skóla.
Meira en fjórðungur íslenskra 15 ára nemenda nær ekki grunnhæfni á neinu þeirra þriggja sviða sem PISA-könnun OECD mælir. Aðeins 56 prósent íslenskra nemenda ná grunnhæfni í lesskilningi og hefur hlutfallið lækkað úr 78 prósentum á tíu árum.
Þetta kemur fram í niðurstöðum PISA 2025 sem mennta- og barnamálaráðuneytið hefur birt og í landsskýrslu Menntavísindastofnunar Háskóla Íslands.
Frammistaða íslenskra nemenda versnar áfram í lesskilningi og stærðfræði og er undir meðaltali OECD-ríkjanna á öllum þremur sviðum könnunarinnar. Í lesskilningi er Ísland fjórða lægst af 38 OECD-ríkjum.
Hlutfall nemenda sem ná grunnhæfni í lesskilningi og stærðfræði lækkaði frá síðustu PISA-könnun árið 2022. Nú ná 56 prósent grunnhæfni í lesskilningi og 62 prósent í stærðfræði. Í vísindum ná einnig 62 prósent grunnhæfni og var breytingin frá síðustu könnun innan skekkjumarka.
Aðeins tvö til fjögur prósent íslenskra nemenda ná svokallaðri afburðahæfni á þeim þremur sviðum sem PISA mælir.
