Tveir þriðju þýskra kjósenda segjast uggandi eftir stórsigur harðlínuflokksins Alternative für Deutschland í þingkosningum í sambandslandinu Saxlandi-Anhalt. Þetta er niðurstaða nýrrar skoðanakönnunar sem gerð var í gær fyrir ARD, samband opinberra útvarps- og sjónvarpsstöðva í Þýskalandi, og náði til rúmlega þúsund kjósenda um land allt.
Einn af hverjum fjórum kveðst ánægður með niðurstöðuna og afgangurinn segir úrslitin engu skipta. Um 76 prósent segja samsteypustjórn Friedrichs Merz kanslara eiga að draga lærdóm af niðurstöðunni. Hún sýni greinilega andstöðu við störf hennar og stefnumál
Það sem vekur einna mesta athygli er að rétt rúmum helmingi svarenda finnst að hinir flokkarnir ættu að tryggja frekari þátttöku AfD í stjórnmálum. Flokkarnir hafa með sér samkomulag um að halda AfD utan allrar samvinnu, svokallaðan eldvegg.
Um 45% svarenda telja að oddvitinn Ulrich Siegmund eigi að verða forsætisráðherra í sambandslandinu. Það mat nær ekki aðeins til kjósenda AfD heldur telur góður þriðjungur Kristlegra demókrata að svo eigi að vera og fimmtungur kjósenda Græningja.
