Katrín Ólafsdóttir, dósent í hagfræði við Viðskipta- og hagfræðideild Háskólans í Reykjavík, telur nýtt fjárlagafrumvarp ekki kynda undir verðbólgu. Hún segir hækkun króbutölugjalda hafa komið sér á óvart. Stjórnarandstaðan og verkalýðsforingjar hafa gagnrýnt frumvarpið.
Daði Már Kristófersson fjármálaráðherra kynnti nýtt fjárlagafrumvarp í dag og borðar fimm milljarða króna afgang á næsta ári. Fjárlög hafa ekki verið afgreidd með afgangi síðan 2018 þegar Alþingi samþykkti fjárlög fyrir ríkisreksturinn 2019.
Stjórnarandstaðan og verkalýðshreyfingin hafa gagnrýnt frumvarpið og lýst áhyggjum af að það sé verðbólguhvetjandi. Katrín tekur ekki undir það.
„Ég get ekki séð að þetta hafi mikil áhrif þar. Þetta séu svona tiltölulega hlutlaus fjárlög hvað það varðar.“
Ekki er verið að bæta í þensluna að mati Katrínar. „Ég get ekki séð að þetta hafi áhrif á hagkerfið og ekki bæta í verðbólguna fyrir utan krónutölugjöldin.“
Verðbólgumarkmiðið ekki viðurkennt
Katrín segir hækkun krónutölugjalda hafa komið sér hvað mest á óvart. Meðal aðgerða í fjárlögunum eru gjaldtaka á vinsælum ferðamannastöðum í eigu ríkisins, hækkað kílómetragjald og hærri bankaskattur.
„Það má alltaf gagnrýna hvaða leiðir eru farnar þarna er náttúrlega verið að hækka eins og kílómetragjaldið sem hefur verið mjög viðkvæmt hjá neytendum,“ segir Katrín.
Krónutölugjöld hækka í takt við verðbólgu. „Ég hef talið æskilegra að halda sig við verðbólgumarkmið, tvö og hálft prósent, og og sýna ákveðna viðurkenningu á verðbólgumarkmiðinu,“ segir Katrín.
